InfoHub Logo

Elordadaǵy bes mektepke pılottyq joba retinde Qazaq kúresi sporty dene shynyqtyrý pánine engiziledi.

«Ótken jyldyń qazan aıynda Qazaq kúresi federasıasynyń ókilderi federasıanyń prezıdenti qyzmetin maǵan senip tapsyrǵan bolatyn. Osy ýaqytqa deıin biz atqarylýy tıis sharýalar men sharalardy rettep, jumysty júıeledik, jospar qurdyq. Soǵan sáıkes, birqatar keshendi jobany iske asyrǵaly otyrmyz. Bizdiń negizgi maqsat – Qazaq kúresin álemdik deńgeıge kóterý», - dedi Qazaqstan Respýblıkasynyń Qazaq kúresi federasıasynyń prezıdenti - Aqparat jáne qoǵamdyq damý mınıstri Dáýren Abaev OKQ-da ótken baspasóz máslıhatynda.

Federasıa prezıdentiniń aıtýynsha, osy maqsatta eń aldymen Qazaq kúresin mektep baǵdarlamasyna engizý jumysy qolǵa alynǵan.

«Qazirgi tańda Qazaq kúresiniń 100 saǵattyq oqý baǵdarlamasy daıyndaldy. Ol oqý baǵdarlamasynda kúrestiń álippesinen bastap ózindik sport túri retinde barlyq qyry, oqytý joldary qamtylǵan. Aldaǵy oqý jyly pılottyq joba retinde Nur-Sultan qalasynda bes mektepte dene shynyqtyrý pánderine Qazaq kúresi engiziledi. Álemniń kóptegen elinde ulttyq sport mindetti túrde mektepte oqytylady. Sol sebepti jumysty rettep alý úshin bastapqyda bes mektepke fakúltatıvti pılottyq joba retinde engizdik», - dedi Dáýren Abaev.

Óz kezeginde federasıanyń bas hatshysy Baqdáýlet Sábıtovtiń Qazaq kúresin mektep baǵdarlamasyna engizý bastamasy osydan úsh jyl buryn kóterilgenin eske saldy. Al Qazaq kúresin damytýdyń 2016-2021 jyldary damytý strategıasynda 2020 jyly Qazaq kúresin mektep baǵdarlamasyna engizý jospary bolǵan.

«Birinshiden 5-11 synyp arasynda kásibı turǵyda daıyndaý josparlanýda. Al 1-4 synyp aralyǵynda Qazaq kúresiniń akrobatıkalyq jattyǵýlaryn úıretý qarastyrylǵan. Qyzdar arasynda da, uldar arasynda da biz balýandardy daıyndaýǵa ázirmiz. Degenmen, ár oqýshynyń óz tańdaýy bar. Sol sebepti biz gımnastıka federasıasymen kelistik. Iaǵnı, balalardy qalaǵandary Qazaq kúresinen bólek gımnastıkany úırene alady», - dedi ol.

---