InfoHub Logo

Otaǵasy" degen atqa laıyq er azamattar azaıǵan, otbasyndaǵy ákeniń róli tómendegen. Óıtkeni onyń otbasyndaǵy ornyn tabysy anyqtaıtyn boldy.
Bala boıyndaǵy jaqsyly-jamandy qasıetterin baıqasa, qazaq ony eń birinshi áke men ata tárbıesinen kóredi, tegine tartqan deıdi. "Ákesi sondaı adam edi, atasy jaqsy adam, kórgendi bala" dep er adam tárbıesin aýyzǵa alady. Óıtkeni ákesiniń balasyna qaldyrǵan eń úlken murasy – onyń jaqsy tárbıesi. Al áke mektebinen ótken bala sol muraǵa qıanat jasamaýǵa tyrysqan.

Balasy 14-15 jasqa kelgende atqa mingizip, alystaǵy aýzy dýaly aqsaqal qarttarǵa sálem berip kel dep jiberetin dástúrdiń umyt qalǵany ókinishti. Birinshiden, balany synǵa salyp, ekinshiden, kópti kórgen kónekóz, kókiregi qazynaly qarttardyń áńgimesine qanyǵýdyń bereri mol edi.
Tarıhta bolǵan jaılardy, babalar erligin jyrlap, shejireni tarqata aıtatyn dana qarıalar qazaqtyń mańdaıyna bitken keń de darhan dalanyń qasıetin sezindirip, babalardyń erligi men kóregen saıasatynyń arqasynda onyń urpaqtan urpaqqa mura bolyp qalǵanyn bala júregine jetkize bilgen edi.

Sondyqtan dástúrli qazaq qoǵamynda tárbıe alǵan qazaq balasynyń ákege degen qurmeti erekshe bolatyn. Júzinen meıirim tógilip turmaǵanmen, qas-qabaǵynan bárin túsinip ósken bala áke qaharynan seskenip júretin. Áke tárbıesi – degen osy.

Áýel Aısherim

---