InfoHub Logo

Qazaqstan ǵalymdarynyń «qara» tizimi ázirlenedi. Bul týraly búgin ǵylym salasyna qatysty zańnamaǵa ózgertýler men tolyqtyrýlar engizý jónindegi zań jobasynyń tujyrymdamasyn talqylaýǵa arnalǵan vedomstvoaralyq komısıa otyrysynda QR Bilim jáne ǵylym vıse-mınıstri Aslanbek Ámrın málim etti.

«Ǵylym týraly qoldanystaǵy zańda normalar men ustanymdardyń buzýshylyǵyn anyqtaý jáne eskertý úshin ǵylymı ádep syndy mańyzdy túsinik tolyq kólemde ashylmaǵan. Biz ǵalymdardyń qara tizimi dep atalatyn túsinik engizýdi josparlaýdamyz. Ol durys saraptama bermeıtinderge nemese olarǵa atústi qaraıtyndarǵa, plagıat máselesine qatysty bolady», - dedi ol.

Onyń aıtýynsha, zań jobasy aıasynda Úkimettiń quzyrynan ǵylym baǵyty boıynsha ǵylymı keńester qurý quziretin alyp, ony Bilim mınıstrligine berý josparlanǵan.

«Biz bul ustanymdardy reglamenttemekpiz. Óıtkeni, «ulttyq ǵylymı keńester jabyq qoǵamdastyq» degen shaǵymdar kóptep túsýde. Olardyń joba ortasyna kelgen búdjetin qysqartýǵa, tipti onyń memlekettik tapsyrma nemese qaýly ekendigine qaramastan da jobany múldem jaýyp tastaýǵa, sonymen birge ǵylymdy qarjylandyrý máselesin qaıta qaraýǵa quqy bar» , - dedi Ámrın.

Mınıstrlik usynyp otyrǵan taǵy bir jaıt ǵylymdy qarjylandyrýdy qaıta qarastyrýǵa qatysty. Atap aıtqanda, tapsyrys berýshi men oryndaýshynyń jaýapkershiligi qarastyrylǵan. Oǵan sáıkes monıtorıń nátıjesinde tıimsiz paıdalanylǵan qarjy búdjetke mindetti túrde qaıtarý kózdeledi. Aldaǵy ýaqytta engiziletin ózgeristerge baılanysty jobalar men baǵdarlamalarǵa bólinetin búdjet qarjysynyń biryńǵaı ákimshisi ǵylymdy damytý boıynsha úılestirýshi retinde  Bilim jáne ǵylym mınıstrligine júkteledi. Oǵan beıindi mınıstrlikter men vedomstvolardan zertteýdi qarjylandyrý jáne úılestirý ókilettikteri beriledi.

---