InfoHub Logo

Memleket basshysynyń bes ınstıtýsıonaldyq reformany júzege asyrý jónindegi 100 naqty qadam - Ult josparynyń 76-qadamynda EYDU elderi standarttarynyń negizinde adam kapıtalynyń sapasyn kóterý, 12 jyldyq bilim berýdi kezeń-kezeńimen engizý, fýnksıalyq saýattylyqty damytý úshin mekteptegi oqytý standarttaryn jańartý qarastyrylǵan. Bizdiń tilshimizben áńgime barysynda QR Bilim jáne ǵylym vıse-mınıstri Elmıra Sýhanberdıeva bilim berýdiń 12 jyldyq modelin engizýdiń mán-jaıyn aıtyp berdi.

-  Elmıra Amangeldiqyzy, Qazaqstanda 12 jyldyq jalpy orta bilimniń modeline kóshý qashan júzege asyrylady jáne osy modelmen barlyq orta mektepter qamtyla ma?

- 12 jyldyq jalpy orta bilim barlyq mektepterde 2019-2020 oqý jylynda iske asyrylady.

- Jańa oqý baǵdarlamalary ázirlendi me? Orta mektep oqýshylary alatyn bilim kólemi aıtarlyqtaı arta ma?

- Jańartylǵan mazmundaǵy oqý baǵdarlamalary Úkimettiń 2015 jylǵy 25 sáýirdegi №327 Qaýlysymen bekitilgen Qazaqstan Respýblıkasynyń bastaýysh bilim berýdiń memlekettik jalpyǵa mindetti standartyna jáne 2016 jylǵy 13 mamyrdaǵy №292 Negizi bilim berýdiń memlekettik jalpyǵa mindetti standartyna sáıkes daıarlandy.

Búginde bilim berýdiń bastaýysh deńgeı pánderi boıynsha 11 oqý baǵdarlamasy, sondaı-aq negizgi orta mektep turǵysynda 17 oqý baǵdarlamasy  ázirlenip, bekitildi.

Jańartylǵan mazmundaǵy  oqý baǵdarlamalary boıynsha oqytýda negizgi ekpin keń shoǵyrly daǵdyǵa qoıylyp otyr.

- 12 jyldyq jalpy orta bilim berýge aýysýǵa qazaqstandyq ustazdar daıar ma?

- «Órleý» biliktilikti arttyrý ulttyq ortalyǵy jáne «Nazarbaev Zıatkerlik mektepteri»  Pedagogıkalyq sheberlik ortalyǵy bazasynda pedagogıkalyq qyzmetkerler biliktiligin arttyrý boıynsha aýqymdy jumys júrgizilýde. 2012-2015 jyldary deńgeıli baǵdarlamalar boıynsha 52,5 myń muǵalim oqýdan ótti. Bul rette olar bilim berýdiń mazmunyn jańartý men 12 jyldyqqa kóshýdegi maqsattardy iske asyrýǵa qoldaý bolady.

Sonymen qatar, bıyl baǵdarlamalardyń jańarǵan mazmuny boıynsha biliktilikti arttyrý kýrstarynan 69 myń pedagog ótti. Mazmundy jańartý joǵary oqý oryndary men kolejderde muǵalimderdi daıarlaý baǵdarlamasynda da kórinis tabady.

- Orta mektepte 12 jyldyq bilim berýge aýysýdy qarjylandyrý qandaı qarjy kózderinen júrgiziledi?

- Oqýlyqtarmen qamtamasyz etý jergilikti atqarý organdary esebinen atqarylady. Pedagogıkalyq qyzmetkerlerdiń biliktiligin arttyrý respýblıkalyq búdjet esebinen  «Órleý» biliktilikti arttyrý ulttyq ortalyǵy men «Nazarbaev Zıatkerlik mektepteri»  Pedagogıkalyq sheberlik ortalyǵynda júrgiziledi, sondaı-aq bul baǵytta jergilikti búdjetter tarapynan da tıisti qadamdar iske asyrylady.

- 12 synypty ornalastyrý úshin qazaqstandyq mektepterde oqýshylar oryndary jetkilikti me?

- Atap ótilgendeı, 12 jyldyq bilim berý nóldik synyp - 11 synyp ustanymy boıynsha engiziledi, ıaǵnı nóldik synyp 5-6 jastaǵy balalar úshin engiziledi - mektepke deıingi daıarlyq.

Búginde mektepke deıingi daıarlyq bizdiń bilim berý júıemizde iske asyrylýda.

12 jyldyq oqytýǵa aýysqan kezde nóldik synyptan ótý múmkindigi mektepke deıingi uıymdarda jáne mektepte saqtalady. Osy arqyly 12 jyldyq bilim berýdi engizýmen oqýshylar ornynyń tapshylyǵy bolmaıdy.

- 12 jyldyq orta bilimge aýysý Qazaqstan halqynyń jalpy bilim deńgeıine qalaısha áser etedi dep oılaısyz?

- Bizdiń elimizde bilim berýdiń dástúrli júıesinen alystaý talpynystary birneshe márte bolǵan edi, alaıda ózgeristerdi fragmenttik engizý bilim berýdiń eski mazmunyna tańylyp otyrdy. Bul óz kezeginde oqý úderisiniń kúrdelenýine jáne beriletin aqparat kóleminiń artýyna alyp keldi.

Bilim berý mazmuny jańarýynyń jáne 12 jyldyqqa aýysýdyń nátıjesi retinde bilim berý sapasynyń artýy bolýy qajet. Sebebi, bilimniń jańa standarty ómirlik is-áreketke daıyndalǵan adamǵa negizdelip otyr. Iaǵnı, osy sharalar belsendi ári shyǵarmashylyq túrde oılaýǵa qaýqarly bolýǵa  jáne áreket etýge, sondaı-aq zıatkerlik, adamgershilik turǵyda ózdiginen damýǵa baǵyttalǵan. Bul rette nátıjege negizdelgen bilim berýdiń modelin engizýge erekshe mán berilip otyr.

- Áńgimeńizge rahmet!

Avtor: Rýslan Ǵabbasov

---