InfoHub Logo

QR Joǵary oqý oryndary qaýymdastyǵynyń tóraǵasy Raxman Alshanovtyń aıtýynsha, aǵymdaǵy jyly jas mamandar biliktilik ortalyqtary arqyly jumysqa tura alady.

"Bıyl alǵash ret jumys berýshiler kásibı standarttardy qalyptastyrý erejesin bekitti. Sonyń negizinde biz oqytý baǵdarlamalaryn júrgizýimiz kerek. Prezıdent te osy máseleni erekshe atap ótti, jańǵyrý sharalary kezinde bilimge negizgi basymdyq beriledi. Al bilim berý júıesi jumys berýshilerdiń talaptaryna saı bolýy shart. Demek, aldaǵy ýaqytta barlyq bilim berý standarttary kásibı standarttardyń negizinde daıarlanady. Endi, jumys berýshiler biliktilikti taǵaıyndaý ortalyqtaryn quryp, sol jerde otandyq mamandardyń suranysqa saı ekenin dáleldeıtin kýálikti beretin bolady. Qazirgi kezde "Atameken" palatasy mamandardy kýálandyrý ortalyqtarynyń tizimin júrgizýge arnalǵan erejeni ázirledi. Bul degenimiz, joǵary oqý orny dıplom beredi. Sosyn jumysqa turǵyńyz kelse, ortalyqqa barasyz. Aıtalyq, taý-ken salasy boıynsha jumys istegińiz kelse, arnaıy ortalyqqa kelesiz, sol jerden naqty kategorıa boıynsha kýálik beriledi. Sóıtip, óndiriske baryp, jumys isteýge bolady. Biz osy máseleni uzaq talqyladyq. Endi, alǵash ret osyndaı sheshim qabyldanyp otyr", - dedi Alshanov búgin Ortalyq komýnıkasıalar qyzmetinde ótken baspasóz máslıxatynda.

Aıta keteıik, buǵan deıin QR Kásipodaqtar federasıasynyń tóraǵasy Ábilǵazy Qusaıynov bıylǵy Joldaýda kórsetilgen máselelerge qatysty óz oıyn bildirgen. Federasıa basshysy arnaıy saýalnamanyń nátıjesinde qazirgi eń tómengi kúnkóris deńgeıiniń anyqtalǵanyn jetkizdi. Onyń aıtýynsha, atalǵan jumystyń tolyq esebi jaqyn arada Úkimettiń qaraýyna usynylady.  Sondaı-aq ol qazirgi kezde Qazaqstannyń eńbek naryǵynda 20 myńnan astam bos jumys oryndarynyń bar ekenin málimdedi. 

---