InfoHub Logo

Qazaqstanda ǵylymı ataqtar úshin qosymsha aqy tólenetin bolady. Bul týraly Ádilet mınıstri Azamat Esqaraevtyń tóraǵalyǵymen ótken vedomstvoaralyq komısıa otyrysynda aıtyldy.

Parlament Senaty depýtattarynyń bastamasymen Ǵylym jáne joǵary bilim mınıstrligine «QR keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» jáne «Ǵylym máseleleri boıynsha salyq jáne búdjetke tólenetin basqa da mindetti tólemder týraly» QR Kodeksine ózgerister men tolyqtyrýlar engizý týraly«zań jobalary engizildi.

«Prezıdent tapsyrmasyn oryndaý maqsatynda zań jobalary aıasynda ǵylymı-pedagogıkalyq qyzmetti júzege asyratyn pedagogtarǵa, sondaı-aq bazalyq jáne irgeli qarjylandyrý sheńberinde negizgi jumys orny boıynsha ǵylymı-zertteý jáne tájirıbelik-konstrýktorlyq jumystarmen aınalysatyn ǵylymı qyzmetkerlerge ǵylymı ataqtary úshin qosymsha aqy tóleý týraly túzetý qoldaý tapty», - dedi Ǵylym jáne joǵary bilim vıse-mınıstri Kamıl Aqatov.

Ǵylym jáne joǵary bilim mınıstrligi Ǵylym komıtetiniń tóraǵasy Darhan Ahmet-Zákıdiń aıtýynsha, ǵylym kandıdaty qazirgi ýaqytta ǵylymı dárejesi úshin 17 AEK (1 AEK – 3450 teńge) alsa, endi ol 25 AEK-ke deıin kóteriledi, sondaı-aq «Qaýymdastyrylǵan profesor» ataǵy qosylady.

«Eger onyń «profesor» ǵylymı ataǵy bolsa, bul kórsetkish 50 AEK-ke deıin ósedi. Iaǵnı, buryn ǵylymı ataq úshin tólenbeıtin, al qazir osy bastama aıasynda Parlament zań shyǵarǵan soń qosymsha aqy tóleý múmkindigi bolady», - komıtet tóraǵasy.

Sondaı-aq arnaıy zań jobasynda uıymnyń búdjet qarajatynan tys esebinen ortasha jalaqysy saqtala otyryp, bir jylǵa deıin shyǵarmashylyq demalys berý máselesi qaraldy. Bul rette shyǵarmashylyq demalys 10 jylda bir retten artyq berilmeıdi. Álemdik tájirıbege sáıkes, mundaı demalys AQSH, Germanıa, Reseı jáne ózge de kóptegen ozyq elderde beriledi.

«Biz qarastyrǵan taǵy bir másele – bıznes qarjylandyratyn jumystarǵa qatysty. Budan bylaı olardyń ǵylymı nemese ınjenerlik-servıstik jumys ekenin anyqtaý úshin belgili bir dárejede saraptamadan ótý usynylady. Qazirgi ýaqytta birqatar bıznes qurylymdar ǵylymı-zertteý jumystaryna jatpaıtyn jobalardy qarjylandyryp júr. Bul bólikke ashyqtyqtyń belgili bir dárejesin engizý qajet», - dep tolyqtyrdy D. Ahmet-Zákı.

Sonymen birge, spıker Ǵylym jáne tehnologıalar jónindegi ulttyq keńes otyrysyndaǵy Prezıdent tapsyrmasymen «sýper shegerimder» dep atalatyn salyqtyq jeńildikter men ınvestısıalyq preferensıalar birtindep engiziletinin atap ótti.

«Jeńildikter arqyly tartylatyn ınvestısıalar jyldan-jylǵa artyp, múddeli kásiporyndar tarapynan qarjylandyrylady dep sanaımyz. Qazirgi ýaqytta ǵylymǵa aqshalaı qarajat negizinen memleket tarapynan aýdarylýda, jyl saıyn 50 mlrd teńgeden astam qarjy bólinedi. Qarjylandyrýdy 1 trln teńgege deıin arttyrý mindetin eskersek, bárin memlekettik bastamalar esebinen qarjylandyrý múmkin emestigi túsinikti. Olar ǵylym men ınovasıany damytýǵa aqshalaı qarajat salýǵa múddeli bolýy úshin bızneske jaǵdaı jasaý qajet. Jańa bastamalarda bıznes te paıda tabatynyn atap ótkim keledi», - deıdi komıtet ókili.

---