InfoHub Logo

QR Ǵylym jáne joǵary bilim mınıstri Saıasat Nurbek Huawei ókilderimen kezdesýinde birlesken jumystyń aralyq qorytyndysyn shyǵaryp, bolashaqqa arnalǵan josparlardy talqylady.

«Ótken jyldyń qyrkúıek aıynda Ǵylym jáne joǵary bilim mınıstrligi men Huawei Technologies Kazakhstan arasynda yntymaqtastyq týraly memorandýmǵa qol qoıylǵanyn eske salyp ótkim keledi. Buǵan deıin Memleket basshysy 2025 jylǵa qaraı 100 000 joǵary bilikti IT mamandar daıarlaýdy tapsyrǵan bolatyn. Úkimet bul maqsatqa jetekshi tehnologıalyq kompanıalarmen seriktestik ornatý arqyly birtindep kóshýde. Bul baǵytta QR Sıfrlyq damý, ınovasıalar jáne aeroǵarysh ónerkásibi mınıstrligimen birlesken jumys jolǵa qoıylǵan», - dep atap ótti Saıasat Nurbek.

Búgingi tańda Huawei kompanıasy elimizdegi joǵary oqý oryndary bazasynda 29 AKT akademıasyn ashty. Onda 4 myńnan astam stýdent oqıdy. Olardyń 600-ge jýyǵy emtıhandardy sátti tapsyryp, IT mamany retinde sertıfıkat aldy.

Sondaı-aq, bıylǵy jyly qazaqstandyq stýdentter «Seeds for the Future» álemdik baıqaýyna qatysa alady. Bul baǵdarlama boıynsha anyqtalǵan eń úzidk stýdentter Qytaıdaǵy Huawei ǵylymı-zertteý kampýsynda taǵylymdamadan ótýge jáne MWC Barcelona 2024 kórmesine qatysýǵa múmkindik alady. Bul bizdiń stýdentter úshin áleýetin ashýǵa jáne álemdik arenada óz bilimderin kórsetýge biregeı múmkindik. Stýdentterdi irikteý birneshe kezeńnen turady: mamyr - JOO deńgeıindegi irikteý, maýsym - onlaın suhbat, tamyz - Katardaǵy 8 kúndik oflaın kýrs jáne Dýbaıdaǵy 5 kúndik aımaqtyq lager.

«Ǵylym jáne joǵary bilim mınıstrligi basqa da joǵary oqý oryndarynda AKT akademıalaryn ashý boıynsha birlesken jumysty jalǵastyrady. Sondaı-aq Huawei kompanıasymen qazaq tilindegi AKT termınderiniń alǵashqy sózdigin ázirleý máselesi pysyqtalýda»,-delingen QR Ǵylym jáne joǵary bilim mınıstrliginiń baspasóz qyzmetitaratqan aqparatta.

---