InfoHub Logo

QR Bilim jáne ǵylym mınıstrligi «Qarjy ortalyǵy» AQ basqarma tóraǵasy Asqar Ibraımov jan basyna shaqqandaǵy normatıvtik qarjylandyrý aıasynda jekemenshik mektepterdi salýǵa qatysty túsinik berdi.

«Búgingi kúnde orta bilim berý salasyndaǵy mańyzdy mindetterdiń biri – júktemesi joǵary memlekettik mektepterge degen aýyrtpalyqty azaıtý, sondaı-aq bilim berý sapasyn arttyrý úshin tartysta mektepter arasynda básekelestikti damytý. 2018 jyldan bastap jekemenshik bilim berý uıymdarynda orta bilim berýge memlekettik bilim berý tapsyrysyn ornalastyrý múmkindigi zańdy túrde bekitildi. Jan basyna shaqqandaǵy qarjylandyrý ádistemesinde jekemenshik mektepter úshin jan basyna shaqqandaǵy normatıv aıqyndaldy», - dedi A. Ibarımov.

Ádistemege sáıkes jan basyna shaqqandaǵy normatıvtiń mólsheri eki komponentten turady, olar:

- memlekettik jalpyǵa mindetti bilim berý standartyn (MJMBS) iske asyrýǵa arnalǵan operasıalyq shyǵystar. Jańadan iske qosylatyn jekemenshik mektepter úshin aǵymdaǵy jylǵa normatıv ortasha eseppen 532 myń teńgeni quraıdy.

- jylyna jańadan engizilgen árbir oqýshy orny úshin ǵımarattyń amortızasıasyna arnalǵan shyǵystar:

- qurylys jaǵdaıynda - 96 AEK (294 myń teńge),

- rekonstrýksıa jasalǵan jaǵdaıda - 47 AEK. (143 myń teńge).

«Onymen qosa, ınvestordyń mektepte balaǵa jaqsartylǵan jaǵdaılardy usynǵany úshin ata-ana tólemaqysyn alýǵa quqyǵy bar. Memleketten tólemder merzimi aıaqtalǵannan keıin, nysan qurylys salýshynyń menshiginde qalady. Alaıda, sharttarǵa sáıkes mekteptiń nysanaly maqsatyn ózgertýge shekteý 20 jyl merzimge tirkeledi», - dedi ortalyq basshysy.

Jobalarǵa qatysý úshin kapıtal nemese qaryz qarajatyn tartýǵa múmkindik, sondaı-aq jer ýchaskesi bolý qajet.

«2019-2021 jyldary 287 jekemenshik mektep (94 696 oryndyq) ashyldy. Jalpy, elimizde jekemenshik mektepterdiń jalpy sany 408-ge jetti», - dedi ol.

Óńirler boıynsha jekemenshik mektepterdi ashýda kóshbasshylar retinde Túrkistan oblysy (56), Shymkent qalasy (52), Almaty qalasy (41), Nur-Sultan qalasy (29), Jambyl oblysy (30), Almaty oblysy (17), Qyzylorda oblysy (16), Mańǵystaý oblysy (14) jáne Aqtóbe oblysy (8) boldy.

---