InfoHub Logo

Elimizde oqýshylarǵa mektep baǵdarlamasynan tys qosymsha bilim berý sharasy memlekettik tapsyrys aıasynda júzege asyrylady jáne ol úshin búdjetten arnaıy qarajat bólinedi. Osy oraıda QR Bilim jáne ǵylym mınıstrligi oqýshysy basyna ortasha eseppen qansha qarjy jumsalatyny týraly málim etti.

«Qosymsha bilim berý týraly memlekettik tapsyrys aıasynda 1 balaǵa bólinetin qarjynyń kólemi ár óńirdegi jergilikti atqarýshy organdardyń qaýlysyna sáıkes aıqyndalyp, bekitiledi. Qolda bar aqparat boıynsha qazirgi ýaqytta bir balaǵa memlekettik tapsyrystyń aılyq ortasha quny 16 myń teńgeden asyp túsedi. Qabyldanyp jatqan sharalar negizinde elimizdegi barlyq oqýshylardyń 69,4% -yn qosymsha bilim berýmen qamtý kózdelip otyr», - delingen aqparatta.

Sondaı-aq, mektep oqýshylarynyń sporttyń qaı túrine úıir ekeni belgili boldy.

«Qosymsha bilim berý aıasynda barlyq oqýshylardy mektep bazasynda tegin sportpen shuǵyldanýǵa múmkindik beretin tıisti sharalar qabyldanyp jatyr. Búginde 1 343 000 oqýshy (bul elimizdegi barlyq oqýshylardyń 39,5%) 42 525 seksıa boıynsha túrli sport túrimen shuǵyldanyp jatyr. Onyń ishinde 40 myńǵa jýyq sporttyq seksıa tegin. Ásirese mektep oqýshylary arasynda voleıbolǵa, (7268 seksıa), shahmat-doıbyǵa (6618 seksıa), fýtbolǵa (6509 seksıa), ulttyq sport túrlerine (5478 seksıa), basketbolǵa (5326 seksıa), tenıske (3175 seksıa) jáne kúrestiń birneshe túrine (2055 seksıa) qyzyǵýshylyqtary basym», - degen jaýap berildi vedomstvodan.

Óskeleń urpaq arasynda sportty nasıhattaý barysynda atalǵan mınıstrlik engizip otyrǵan taǵy bir jańashyldaq mektepte sporttyq seksıany júrgizetin dene shynyqtyrý pán muǵalimderine jalaqysynan bólek qosymsha ótemaqy tólenedi.

---