InfoHub Logo

«Qazaqstandaǵy balalar jyly: balalardyń quqyqtaryn qorǵaý salasyndaǵy ózekti máseleler, túıindi syn-qaterler men múmkindikter». Elordada Chehıa, Horvatıa, Vengrıa, Qyrǵyzstan jáne basqa da elderdiń halyqaralyq sarapshylarynyń qatysýymen konferensıa ótti.

"Elimizdiń Prezıdenti 2022 jyldy Balalar jyly dep jarıalady. Bul memlekettiń óskeleń urpaqqa mańyzdy kóńil bólý jáne elimizdiń bolashaǵyna qamqorlyq jasaý deńgeıin kórsetedi. Elimizdegi halyqtyń úshten bir bóligi – balalar. Balalar jyly ishinde bilim berý uıymdarynda balalardyń tamaqtanýyn jaqsartý boıynsha sharalar qabyldandy. Tamaqtaný sapasyn kúsheıtý, tamaqtaný qunyn retteý, qolma-qol aqshasyz esep aıyrysýdy engizý bóliginde Tamaqtanýdy uıymdastyrý qaǵıdalaryna ózgerister engizildi. Mekteptegi tamaqtanýdy qoǵamdyq baqylaý jandandyryldy. Mańyzdy baǵyttardyń biri – qolaıly jaǵdaılardy qamtamasyz etý. Apatty mektepterdi, úsh aýysymdy oqytýdy jáne oqýshy oryndarynyń tapshylyǵyn joıý úshin Prezıdent tapsyrmasy boıynsha «Jaıly mektep» ulttyq jobasy ázirlendi. Baǵdarlamaǵa sáıkes qalalar men aýyldarda 800 myńnan astam jańa oqýshy oryndaryna 401 mektep salynady", - dedi Oqý-aǵartý mınıstri Ashat Aımaǵambetov konferensıadaǵy quttyqtaý sózinde.

Mınıstr Balalar jylyndaǵy kelesi basym baǵyt balabaqshalarda, mektepter men kolejderde balalardyń qaýipsizdigin qamtamasyz etý ekenin atap ótti. Barlyq bilim berý uıymdarynda kameralar ornatyldy, bilim berý obektilerin qorǵaýdy kúsheıtý boıynsha jumystar júrgizilip keledi, týrnıketter, dabyl túımeleri ornatylyp jatyr.

Balalar jyly tuńǵysh ret balany qorqytýdan (býllıngten) qorǵaý quqyǵy bekitildi, tıisti aldyn alý erejelerin ázirleý boıynsha quzyret engizildi, bul qýdalaýǵa ushyraǵan balalarǵa ýaqtyly eskertýge jáne qajetti kómek kórsetýge múmkindik beredi. Sonymen qatar, bıyl Bilim berý uıymdarynyń psıhologıalyq qyzmetiniń biryńǵaı qaǵıdalary qabyldandy.

Elimizde balalardyń ál-aýqatynyń ındeksi alǵash ret ázirlendi. Ár baǵytta laıyqty ómir súrý jaǵdaılaryna, bilimge, densaýlyq saqtaýǵa, ınfraqurylymǵa, zorlyq-zombylyqtan qorǵaýǵa jáne áleýmettenýge qol jetkizýdi kórsetetin eń mańyzdy ındıkatorlar tańdaldy.

Mektepke deıingi tárbıeleý men oqytýdy damytý modelin iske asyrý jalǵastyryldy. Bul mektepke deıingi uıymdar jelisin keńeıtý, balabaqshalarǵa biryńǵaı kezektilik boıynsha platforma ázirleý, bul kezekte qaıtalanýdy boldyrmaýǵa múmkindik beredi.

Múmkindigi shekteýli balalardy tirkeýdi avtomattandyrýdy kózdeıtin PMPK modýli ázirlendi. Bir PMPK ashý normatıvteri 60 myńnan 50 myń balaǵa azaıtyldy.

Sonymen qatar, Balalar jyly mektep avtobýstarynyń avtobýs parki alǵash ret aýqymdy túrde jańartyldy. Ol 515 jańa avtokólikpen tolyqtyryldy. Sondaı-aq, mektep kitaphanalarynyń materıaldyq-tehnıkalyq bazasy alǵash ret keshendi túrde jetildirildi. Kórkem ádebıet qory memlekettik tildegi basylymdarmen tolyqtyryldy.

"Men búgingi konferensıaǵa qatysyp otyrǵanyma qýanyshtymyn. Bul konferensıaǵa óz qatarlastarynyń quqyqtaryn qorǵaý boıynsha jumys júrgizetin balalar ókilderiniń qatysqany da óte jaqsy. Balalarǵa salynatyn ınvestısıalar – bolashaqqa salynatyn ınvestısıalar. Qazaqstan osy baǵytta nátıjeli i-ssharalar qabyldap keledi. Oqý-aǵartý mınıstri aıtqandaı, Balalar jyly ishinde júrgizilgen jumys keıingi jyldary da jalǵasatyn bolady. Biz yntymaqtastyqqa daıynbyz", - dedi BUU-nyń Qazaqstan Respýblıkasyndaǵy Turaqty úılestirýshisi Mıkaela Frıberg-Storı.

BUU Balalar qorynyń (IýNISEF) Qazaqstan Respýblıkasyndaǵy ókili Artýr van Dıren Qazaqstan balalardyń múddelerin qorǵaýdy qamtamasyz etý jáne olardyń ál-aýqatyn arttyrý úshin ilgerindi qadamdar jasap jatqanyn atap ótti.

"IýNISEF Qazaqstanda uzaq ýaqyt boıy ulttyq jáne jergilikti deńgeıde balalardyń ál-aýqatynyń monıtorıńi júıesin qurýǵa qoldaý kórsetip keledi. Ortalyq jáne jergilikti atqarýshy organdar Balalardyń ál-aýqatynyń ındeksin jumys quraly, máselelik suraqtardy kórsetetin kompastyń bir túri retinde paıdalanady dep úmittenemiz. Ol obektıvti kórsetkishter negizinde balalardyń múddesi úshin sheshim qabyldaýǵa kómektesedi", - dedi BUU Balalar qorynyń (IýNISEF) Qazaqstan Respýblıkasyndaǵy ókili Artýr van Dızen.

Aıta keteıik, konferensıaǵa BUU-nyń Bala quqyqtary jónindegi ókilderi, Qazaqstandaǵy BUU Balalar Qory (IýNISEF), Parlament, úkimettik emes uıymdar, bala quqyqtary jónindegi ýákilder, pedagogter, ata-analar jáne balalar ókilderi qatysty.

---