Bir uzyn alyp qolǵa myqty shybyq,
Qazdaryn qalaǵa aıdap shyqty mujyq.
Qýalap baıǵustardy keledi uryp,
Asyǵyp bazar kúnge jany shyǵyp.
Teksergen mujyq isin baıqap, oılap,
Oǵan da durys emes kiná qoımaq.
Asyqty bazar kúnge, paıda kóp dep,
Qazdardy urdy ma ol bosqa oınap?
Deseńder olsyz bazar taramaıdy...
Der edim mujyq isi jaramaıdy.
Paıdasy, bazar ótip, keter jerde,
Qaz túgil, adamǵa da qaramaıdy.
Bizdershe qazdar biraq synamady,
Olarǵa mujyq isi unamdy.
Jolyqqan jolaýshyǵa bári shýlap,
Mujyqtyń isin aıtyp, kinálady:
«Bar ma eken bizden, sirá, sory qalyń!
Qojasyp qýalaıdy mujyq jarym.
Qorlaıdy uryp-soǵyp, oılamaıdy
Moınynda qandaı mindet, qaryz baryn.
Oılasa, qaıdan bizdiń asylymyz?
Rýmdy qutqarǵan qaz násilimiz!
Aıt istep atamyzdyń qurmetine,
Ótpeıdi háman onda jyl meıramsyz!
Taıaq jep jaı qazdarsha, júrgenimiz
Nadanǵa dýshar bolyp bir bilimsiz!»
Qazdarǵa jolaýshy aıtty:
«Toqtańdarshy,
Aýysqan aqyny aıtyp, joqtańdarshy.
Senderdi qadirleýge ne úshin mindet?
Mujyqty aıypty qylyp, boqtańdarshy!»
«İstegen atamyzdyń isi qaıda?
Rýmdy qutqarǵany azǵantaı ma?»
«Qoıa tur, - jolaýshy aıtty, - kórdegińdi!
Ózderiń keltirdińder qansha paıda?»
«Aıttyq qoı atamyzdyń etken isin!
Álde óziń sózimizge senbeımisiń?»
«Senemin hám bilemin atań jaıyn,
Senderdi qadirleýge deımin ne úshin?
Ótkizdi óz bastaryń qandaı eńbek?
Atańda kórde jatqan joq jumysym».
«Bizdiń be?...joq ótkizgen eńbegimiz!»
«Áste jón, syılamasa, kónbegińiz.
Meni de, atam jaqsy, qadirle dep,
Talasyp qıyn bolar jeńbegińiz.
Jaqsy-aq bop atalaryń ótken shyǵar,
İsine qaraı qurmet etken shyǵar.
Qaldyrmaı asylynan arttaǵyǵa,
Ózimen jaqsylyǵy ketken shyǵar.
Kórdegi kómek bolmas babalaryń,
Kem bolsa ózderińniń baǵalaryń.
Kónińder ursa, soqsa, soısa daǵy,
Bolǵan soń qýyrdaqtyq shamalaryń».
Ketermin, baıandasam, alysqa bek,
Laıyq hár nársege kerek qoı ep.
Jaıynan jat qazdardyń sóılegen sóz
Kóbine jaqyn qazdyń tıetin dop.
Betine kórdeginiń kónin ustap,
Dep júrgen «kóriktimin» qazaqtar kóp.
Qysqartyp, sóz aıaǵyn toqtatamyn,
Solardyń ókpesine qalarmyn dep.

---