InfoHub Logo

Smagýlova A.S. ál-Farabı atyndaǵy Qazaq ulttyq ýnıversıtetiniń halyqaralyq qatynastar fakúlteti, dıplomatıalyq aýdarma kafedrasynyń dosenti

Janýzakova G.A. ál-Farabı atyndaǵy Qazaq ulttyq ýnıversıtetiniń halyqaralyq qatynastar fakúlteti, dıplomatıalyq aýdarma kafedrasynyń aǵa oqytýshysy

Ál-Farabı atyndaǵy Qazaq ulttyq ýnıversıtetinde «Ahmet oqýlary» aıasynda «Ahmet Baıtursynuly jáne ǵylym tili» atty halyqaralyq ǵylymı-teorıalyq konferensıa ótti. Oǵan belgili memleket jáne qoǵam qaıratkerleri, otandyq jáne sheteldik tilshi, ádebıetshi ǵalymdar men bilim alýshy jastar qatysty.

Konferensıaǵa QR Parlamenti Senatynyń Tóraǵasy Máýlen Áshimbaev quttyqtaý joldady. Onda: «Ahmet Baıtursynuly – óte tereń, jan-jaqty tulǵa. Ol til, ádebıet, lıngvısıka, pedagogıka, saıasat sıaqty salmaqty salalarda ultynyń bilimin molaıtyp, erkindikke qol jetkizýine bar kúshin jumsady. Ultyna «Qyryq mysal» arqyly ún qatyp, qazaǵyn masa bolyp oıatýǵa talpyndy. Qaıratker tulǵanyń jetekshiligimen tuńǵysh jalpyulttyq «Qazaq» gazeti jaryq kórdi. Ahań ult kósemi Álıhan Bókeıhanuly jáne Mirjaqyp Dýlatulymen birge Alash qozǵalysynyń basynda turdy. Osylaısha ultymyzdy qalamgerligimen de qaıratkerligimen de egemendigine jeteledi», – delingen.

Sonymen qatar jıynǵa «Til-Qazyna» ulttyq ǵylymı-praktıkalyq ortalyǵynyń bas dırektory Erbol Tileshov qatysyp, QR Joǵary bilim jáne ǵylym mınıstri Saıasat Nurbektiń quttyqtaý sózin oqydy. Mınıstr: «Búgingi alys-jaqyn shetelder men elimizdiń ǵalymdary qatysyp otyrǵan konferensıanyń nátıjeleri qazaq tiltanýy úshin ǵana emes, memlekettik tildiń ǵylym tili deńgeıinde qoldanylýyna qosylatyn asa mańyzdy jumys bolady dep sanaımyn. Ǵalym eńbekterin tereńirek zertteý jalǵasa bererine senimim mol», – deı kele, ahmettanýshy ǵalymdarǵa alǵys bildirdi.

Alqaly jıynda Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev qatysýshylarǵa óz quttyqtaýyn jetkizdi.

«Ál-Farabı atyndaǵy Qazaq ulttyq ýnıversıteti Ahmet Baıtursynovtyń bıylǵy 150 jyldyq mereıtoıyna jan-jaqty daıyndyqpen keldi. Ǵalym muralaryn qamtyǵan ǵylymı-tájirıbelik konferensıalar ótkizildi. Ult ustazynyń tańdamaly eńbekteri kóptomdyq retinde shyǵaryldy. Bul shyǵarylymnyń basty ereksheligi – stýdentter A.Baıtursynuly eńbeginiń túpnusqasyn oqýǵa tolyq múmkindik aldy. Bıyl ýnıversıtetimizdegi Qazaq til bilimi kafedrasyna Ult ustazy – Ahmet Baıtursynulynyń esimi berildi», – dep atap ótti Janseıit Túımebaev.

Konferensıany júrgizgen Ahmet Baıtursynuly atyndaǵy Til bilimi ınstıtýtynyń dırektory Anar Fazyljan óz sózinde ınstıtýttyń bıylǵy atqarǵan jumystaryn tilge tıek etti. Ǵalymdar men jas izdenýshiler ult ustazynyń mol murasyn jańa qyrynan zertteýge bet burǵanyn aıta kele, sharanyń máni men mańyzyna toqtaldy.

Sondaı-aq sharada Túrkıanyń Osmanǵazy ýnıversıtetiniń profesory Ferrýh Aǵja, QR UǴA akademıgi Sherýbaı Qurmanbaıuly, Ál-Farabı atyndaǵy QazUÝ-dyń A.Baıtursynuly atyndaǵy kafedra meńgerýshisi Anar Salqynbaı jáne ózge de baıandamashylar sóz alyp, Ahmet Baıtursynulynyń ulttyq ǵylym tiliniń qalyptasýyna sińirgen eńbegi, terim sózderiniń negizdiligi, ǵalym jasaǵan lıngvısıkalyq termınderdiń metaforalyq sıpaty men mazmuny, aqynnyń dramatýrgıaǵa qatysty oı-pikirleri jaıly oı qozǵady.

Qatysýshylar Baıtursynov tanymy arqyly jastardyń oı-órisin keńeıtýdiń mańyzyna mán berip, onyń memlekettik tildi ǵylym tiline aınaldyrýǵa negiz salǵanyn jáne ǵylymı jańalyqtardyń qazaq tilinde jazylýyna basymdyq berý qajettigin tujyrymdady.

---