InfoHub Logo

Smagýlova A.S. ál-Farabı atyndaǵy Qazaq ulttyq ýnıversıtetiniń halyqaralyq qatynastar fakúlteti, dıplomatıalyq aýdarma kafedrasynyń  dosent
Janýzakova G.A. ál-Farabı atyndaǵy Qazaq ulttyq ýnıversıtetiniń halyqaralyq qatynastar fakúlteti, dıplomatıalyq aýdarma kafedrasynyń aǵa oqytýshysy

Álemde ǵylym men joǵary tehnologıa boıynsha Kúnshyǵys eli ózgelerden áldeqaıda alda turǵany belgili. Japon halqy bilimi men zamanaýı tehnologıalaryn muqym jurtpen bólisip keledi. Keıipkerimiz Tomonobý Sakýraı – Iokogama Toın ýnıversıtetiniń profesory, PhD doktory. 1966 jyly 4 aqpanda Japonıanyń Kanagava ólkesinde dúnıege kelgen. Ál-Farabı atyndaǵy QazUÝ-dyń Dene shynyqtyrý jáne sport kafedrasyna shaqyrylǵan profesor.

Ǵalym mansaptyq jolyn Iokogama ulttyq ýnıversıtetinen bastap, bilim berý fakúlteti, bilim berý salasyndaǵy bakalavr dárejesin alady. Al bolashaq ǵalymǵa 1990 jyly Jattyǵý jáne sport ǵylymdary zerthanasy, Iokogama ulttyq ýnıversıtetiniń bilim berý fakúlteti, «Jattyǵý qarqyndylyǵyna zár laktatynyń áseri» taqyrybyndaǵy dısertasıa úshin fızıologıa boıynsha magıstr dárejesi beriledi. 2012 jyly Tokıo aýyl sharýashylyǵy ýnıversıtetiniń Ekologıalyq sımbıotıkalyq ǵylym departamentiniń joǵary mektebi, «Qańqa bulshyqetindegi eksentrlik bulshyqet jıyrylýynan keıingi bulshyqet regenerasıasyndaǵy azot oksıdiniń róli» atty dısertasıasy úshin jattyǵýlar fızıologıasy boıynsha PhD dárejesin alady.

2022 jyldyń 13 aqpanda Dene shynyqtyrý jáne sport kafedrasynyń profesorlyq-oqytýshylyq quramy jas ǵalymdar jáne stýdentter arasynda Lıtvadan kelgen sheteldik ǵalym Kazıs Mılashıýspen birge, profesor Tomonobý Sakýraımen onlaın kezdesý ótkizgen-di. Kafedranyń oqý úderisine magıstranttar men doktoranttarǵa dáris oqyp, semınarlar júrgizdi. Sondaı-aq áriptestik baılanystardy damytý jáne shet memleketterdiń ozyq tehnologıalary men ınovasıalyq ádisterin meńgerý úshin atalmysh profesorlar tartylýda. Kezdesý barysynda Dene shynyqtyrý jáne sport kafedrasynyń meńgerýshisi, p.ǵ.k. Á.Ysqaqova sheteldik ǵalymdarmen ǵylymı semınarlar, halyqaralyq konferensıalar uıymdastyrý jáne ótkizý, birlesken maqalalar men oqý quraldaryn shyǵarý, ǵylymı taǵylymdamadan ótý jáne yntymaqtastyq týraly kelisimderge qol qoıý boıynsha halyqaralyq yntymaqtastyqty odan ári jalǵastyrýdy usynǵan bolatyn. Atalmysh kezdesýdiń jemisi retinde 23 qarasha men 1 jeltoqsan aralyǵynda Ál-Farabı atyndaǵy QazUÝ-da Dene shynyqtyrý jáne sport kafedrasy Tomonobý Sakýraıdyń «Dene shynyqtyrý jáne sport ǵylymyn qańqa bulshyqetteri turǵysynan oqytý» baǵdarlamasy (72 saǵattyq kólem) boıynsha biliktilikti arttyrý kýrstaryn ótkizdi.

Semınar barysynda elimizdegi dene shynyqtyrý ustazdary men sport salasy mamandarynyń biliktiligin arttyrý baǵytynda mańyzdy ister talqylandy. Maqsaty – elimizdegi dene shynyqtyrý deńgeıin kóterý, QazUÝ-dyń sheteldik profesorlarmen yntymaqtastyq aıasyn keńeıtý jáne halyqaralyq arenada Otanymyzdyń namysyn qorǵaıtyn jańa býyn tárbıeleý. Kýrstarǵa mektep muǵalimderi, joǵary oqý oryndarynyń oqytýshylary jáne sport mektepteriniń jattyqtyrýshylary qatysty. Kýrstar dáris jáne tájirıbelik sheberlik sabaqtary túrinde sport alańynda birneshe seksıalar boıynsha ótkizildi. Mysaly, sport ǵylymynyń negizderi, júgirý, sekirý jáne laqtyrý negizderi, sport ǵylymynyń tájirıbesi, jattyǵýlar týraly ǵylym, málimetterdi taldaý, bolashaqtaǵy sport ǵylymy. Dene shynyqtyrý jáne sport kafedrasynyń meńgerýshisi Álmıra Ysqaqova atalmysh is-shara týraly óz pikirin ortaǵa saldy.

---