Aldıar arýaǵyńa etkem, qymyz,
Seni ishken muratyna jetken qymyz.
Meıli dońyz bolsyn, qońyz bolsyn,
Ieńniń túkirigin em etken qymyz.

Bas ıip aıdynyńa aýyl - aımaq,
Qoıasyń qoǵamyńdy jipsiz baılap.
Qudaı ıip qulqynǵa túse qalsań,
Esildeı esip, shalqyp, aqaqaılap.

Tizeden segiz qarys qara saba,
Jybyrlap aınalańda bala - shaǵa.
Dúnıede neshe túrli nyǵymet bar ǵoı,
Sonda da seniń jóniń jeke dara.

Kópirseń jumsaq ıisi anadaıdan,
Keýdeńdi jaryp keter álde qaıdan.
Ekpiniń esh nársege jol bere me,
Ózendeı gúr - gúr etip aqqan saıdan!

Adamnyń dúnıedegi bári dosyń,
Sıqyr ma, bu ne ǵajap seniń osyń?
Eringe bir - eki kún tımeı júrseń,
Keltirmeı, qurystatyp kóńil qoshyn.

Shaldardyń pisken daýsyń esin alyp,
Otyrtpaı úılerine túrtki salyp,
Meıliń tep, meıliń aqyr, meıliń jekir,
Kek qylmas saǵan eshkim kóńili qalyp.

Magnıtiń tústik jerden qonaq buryp,
Ádeıi sálem úshin burys júrip,
Baı, kedeı, jaqsy , jaman, tóre, qara,
Japyrylyp yńǵaıyńa báıik turyp.

Ásirese, qajy, sopy, qoja - molda,
Sartta - surt taspyqtaryn alyp qolǵa.
Jaýdyrtyp kelgennen - aq batalaryn,
A, qudaı, ońda da, ońda, arýaq qolda.

Osylaı zıarat qyp jurttyń bári,
Aýzyńnan shyqqan sóziń bolyp dári.
«Myrza - eke, ıe solaı» dep bas ızese,
Táshtıtip tanaýyńdy onan ári.

Sapyrsań sar sharaǵa qulash kerip,
Jıylǵan meımanyńa quıyp berip,
Ata ulyn, ene qyzyn bezip tastap,
Ketpeı me, eki udaıda saǵan erip.

Kásipsiz kózin satqan sorly kedeı,
Qoıa ma piskek ańdyp tentiremeı.
Ataǵyńdy kóterer alǵys aıtyp,
Baıǵusqa bir jutqyzsań « ket, shyq » demeı.

Shatyp - put, ne qylsań da sóziń dámdi,
Kisi joq bu jıhanda senen sándi.
Qymyzsyz, maǵan salsa Aplaton bol,
Kórmessiń sóziń tyńdar eshbir jandy.

Basyńnan qymyz ketse, qyzyq keter,
Syn - syıyq, sáýletińdi buzyp keter.
Keshegi báıek bolyp otyrǵan jurt,
Kúderin búgin senen úzip keter.

Aram ter bolma, dostym, tekke shaýyp,
Alǵansha aýzyńdy bas qymyz taýyp.
Qymyz tap ta q... ber, lapyr ,aqyr,
Jerde sózim qalar dep qylma haýip.

Eı, qymyz, yza qyldyń qolǵa túspeı,
Onda men júremin ǵoı kúıip - pispeı.
Júrektegi qapamdy aıtqyzar em,
Ólsem de jurtqa berip, ózim ishpeı.

---