InfoHub Logo

Osy jyldyń qyrkúıeginde balalar onlaın oqı ma, álde mektepke bara ma? Bul suraqqa Bilim jáne ǵylym mınıstri Ashat Aımaǵambetov jaýap berdi.

«Birinshiden jalpy daıyndyq joǵary deńgeıde júrgizilip jatyr. Aıaqtalǵan oqý jylynyń tórtinshi toqsanynda da daıyndyq jumystary toqtap qalǵan emes. Bul týraly buryn da aıtqanbyz. Ekinshiden, bul turǵyda Bilim jáne ǵylym mınıstrliginiń jalpy jospary bar. Kúrdeli epıdemıologıalyq jaǵdaıdy eskere otyryp, biz áý bastan úsh negizgi nusqaǵa daıyndaldyq. Boljamymyz durys bolyp shyqty», — dedi Ashat Aımaǵambetov Bilim jáne ǵylym mınıstrliginiń onlaın formattaǵy tilshilermen kezdesýinde.

Mınıstrdiń aıtýynsha osy úsh baǵyt boıynsha daıyndyq jumystary qyzý júrgizilýde.

«Osy úsh nusqa Densaýlyq saqtaý mınıstrligimen, basqa da memlekettik organdarmen talqylaný ústinde. Onyń qyr-syryn zertteý boıynsha jumys toptary bar. İske ǵalymdar men pedagogtardy, mektep dırektorlary men sarapshylardy tarttyq. Sol sebepti qazirgi ýaqytta barly óńirde úlken talqylaý jumystary júrgizilýde. Osyǵan deıin áleýmettik jelide tarap ketken slaıd-materıal Bilim jáne ǵylym mınıstrligine tıesili emes. Ony mektep deńgeıinde talqylaǵandardyń biri taratýy múmkin», — dedi ol.

Ashat Aımaǵambetov sonymen birge muǵalimderge arnalǵan kýrstar daıyndalǵanyn jetkizdi.

«Eń mańyzdy suraqtardyń biri — pedagogterdiń qazirgi jańa jaǵdaıǵa daıyndyǵy. Qandaı nusqa qabyldansa da pedagogterge jańa daǵdy kerek. Ony tórtinshi toqsanda aıqyn baıqadyq. Sondyqtan bes modýlden turatyn osy kýrstar – İT-daǵdy, sıfrlyq pedagogıka máselelerin qamtıdy. Qandaı nusqa qabyldansa da — osy kýrstardy júrgizemiz. Sondaı-aq kompúter men serverler, ınternet máselesi. Qashyqtan oqysaq ta, qalypty oqysaq ta — mektepterge kompúter kerek. Ákimdikter osy máselege jiti nazar aýdaryp otyr. Eger mektepte bir kompúterge 20-25 baladan kelse, onda olardyń İT-daǵdysyn damytamyz degen sóz beker», — dedi ol. Mınıstr óz sózinde erekshe qajettiligi bar balalarǵa beriletin bilim sapasy máselesi de umytylmaıtynyn jetkizdi.

Eske sala ketsek Prezıdent Qasym-Jomart Toqaev Úkimettiń keńeıtilgen otyrysynda mektepterdiń aldaǵy jańa oqý jylyna daıyndyǵyn pysyqtaǵan bolatyn.

«Bul — ákimdikter men mınıstrliktiń jumysynyń nátıjesi. Ákimdikter jańa oqý jylyna dereý daıyndalyp, mektepter men jekelegen muqtaj otbasylardy qajetti tehnıkamen jabdyqtaýǵa tıis. 1 qyrkúıekte jańa oqý jyly bastalady. Mınıstrliktiń bul oqıǵaǵa daıyndyǵyna kúmánim bar. Balalar qalaı oqıdy — mektepte nemese qashyqta? Muǵalimderdiń jańa oqý jylyna daıyndyǵy qandaı?», — dep suraq qoıdy Memleket basshysy.

---