InfoHub Logo

Taıjan birde Atbasar jármeńkesine barady. Ertkeni — eldiń betke ustar aqyndary, termeshi jigitteri bolsa kerek. Ózi syrnaımen belbeýletip án salyp, jınalǵandardyń nazaryna iligedi. Osy jármeńkede syrnaıdy quıqyljyta tartyp, atyn bıletetin qytaı jigiti elge óner kórsetip júredi. Taıjandy qyzyqtyrǵany onyń syrnaıynyń jańa, ári úndileý ekendigi bolady. Taıjan onyń qasyna kelip:

— Men seniń atyńdy bılete alsam, ne berer ediń? — deıdi.

— Joq, bılete almaısyń. Ol tek ózim syrnaı tartqanda ǵana bıleıdi, — deıdi jigit.

— Endeshe, bás tigeıik. Eger bıletip bersem, onda syrnaıyńdy maǵan syıǵa tartasyń, — deıdi.

— Jaraıdy, aıtqanyń bolsyn.

Taıjan óziniń syrnaıymen nebir áýenge salady. Biraq at bıleı qoımaıdy. Sosyn, bolmaǵan soń jigittiń syrnaıyn surap alyp, naǵashysy úkili Ybyraıdyń «Gákkýin» tamyljyta tartady. Sol-aq eken, at bıleı jóneledi. Tigilgen bás óz aldyna, eger daý týǵyzǵysy kelse, Taıjannyń alǵashqy sátte-aq utylǵanyn, ári at bıletken syrnaı óziniki ekenin tilge tıek eter edi ǵoı. Biraq qytaı jigiti Taıjannyń asqan ónerine dán rıza bolyp, jańa syrnaıyn syıǵa tartady. Syılyq syrnaı aqynǵa kóp jyl aınymas serik bolyp, shabytyna shabyt qosqan eken.

---