InfoHub Logo

Baıaǵy zamanda bir sulý qyzdan úmittengen jas jigit oǵan kelip, óziniń kóńilin bildiredi. Sonda qyz:

— Men jumbaq aıtam, sony tapsańyz ǵana sizge tıem,— deıdi.

— Jaraıdy, aıtyńyz jumbaǵyńyzdy!— deıdi jigit.

Qyz jumbaǵyn aıtady:

Balqan taý da, balqan taý,
Basyna shyqqan kim eken?
Jolda turǵan jońyshqa,
At semirtken kim eken?
Jez buıdaly nar taılaq,
Ony kórgen bar ma eken?
Jeldep ketken jeti atan,
Ony kórgen bar ma eken?
Qaıta shókken qart býra,
Ony kórgen bar ma eken?
Egiz qozy súıiksiz,
Ony kórgen bar ma eken?
Aıdalada jeli arqan,
Ony kórgen bar ma eken?
Jaı, jaı kilem, jaı kilem,
Ony kórgen bar ma eken?
Túr, túr kilem, túr kilem,
Ony kórgen bar ma eken?

Qyzdy muqıat tyńdaǵan jigit:

— Jumbaǵyńyz onsha qıyn emes eken,— dep onyń sheshýin lezde aıtyp beredi:

Balqan taý da balqan taý,
Basyna shyqqan bazarshy,
Jolda turǵan jońyshqa,
At semirtken jolaýshy.
Jez buıdaly nar taılaq,
Bıkeshińiz bolmasa.
Jeldep ketken jeti atan,
Jeti aǵańyz bolmasa.
Qaıta shókken qart býra,
Qaıyn atańyz bolmasa.
Egiz qozy súıiksiz,
Eki anaryńyz bolmasa.
Aıdalada jeli arqan,
Túlki paqyr bolmasa.
Aıdalada qý qazyq,
Qoıanyńyz bolmasa.
Jaı, jaı kilem, jaı kilem,
Jazylyp jatqan jer bolar.  
Túr, túr kilem, túr kilem,
Túrilip shyqqan kún bolar.

— Taptym ba, tálim qyz, endi ne amalyńyz bar? — dep, jigit sózin aıaqtaıdy.

— Iá, jumbaǵymnyń sheshýin durys taptyńyz,endi sizge tıemin,— deıdi qyz ýádesinde turyp.

---