InfoHub Logo

Qurmetti toıǵa jınalǵan aǵaıyn-jurt, dostarymyz ben joldastarymyz!

Shynymdy aıtsam, sizderdiń aldaryńyzda shańyraǵymyzdan ushyrǵaly otyrǵan aq kógershindeı aıaýly qyzyma qandaı aq jol, sát saparlyq tilek tilerimdi bilmeı tolqyp turmyn. Eń durysy, negizgi sózimdi qyzyma arnaǵanym jón sıaqty....

Úıimizdiń sáni, ákeń ekeýimizdiń aıalap ósirgen qyzǵaldaǵymyz, súıikti de súıkimdi qyzym meniń!

Keshe ǵana «ińgálap» ómirge kelgeniń de,tulymshaǵyń jelbirep júgirip júrgeniń de, shashyńa aq bantık taǵyp alǵash mektep tabaldyryǵyn attaǵanyń da, joǵarǵy oqý ornyna túskende «Mama, Papa! Men stýdent atandym!» dep qýanyshtan júregiń jaryla súıinshi suraǵanyń da... – bári-bári de keshe ǵana sıaqty edi. Ýaqyt netken júırik deseńshi! Endi mine búgin ómirlik serik-syńaryńdy taýyp, uıadan ushqaly tursyn.

Seni jat bosaǵaǵa qansha qımasaq ta tabıǵattyń talaby, ómirdiń zańy osylaı eken - qyz bala jat jurttyqqa jaralǵan.

Aınalaıyn qyzym........!

Sen arqyly órisimiz keńeıip, jańa jekjattar taýyp, quda-qudaǵı bolyp jatyrmyz. Sen endi eki eldiń arasyndaǵy elshisiń. Aldyńda jańa ómir, jańa orta, jańa týystar men dostar kútip tur. Sol ortamen til tabysyp, úırenisip, bosaǵasyn attaǵan áýletińe týǵan qyzyndaı bolyp sińisip ketetinińe senemin. Óıtkeni osy kúnge deıin papań ekeýimizdiń bergen tárbıemizdi zaıa ketirmeı, jaman sóz keltirmeı, senimimizdi aqtap, aınalańa, qorshaǵan ortańa árqashan súıikti, súıkimdi bolyp júrdiń emes pe?!

Meniń tilegim. Osy qalpyńnan aınymaǵaısyń, kúnim! Qudaıym basyńnan baǵyńdy taıdyrmasyn!

Bastaǵaly otyrǵan jańa ómiriń baqytty, qyzyqty kúnderden quralsyn. Tabaldyryǵyn attaǵaly turǵan bosaǵaǵa jańa basqan qadamyń qut ákelsin!

Ákeń men shesheńdi qalaı qurmettegen bolsań, atań men eneńdi solaı qurmettegin, kúnim! Syńaryńmen jubyń jazylmaı, baqytty da tatý-tátti ǵumyr keship, ósip-ónińder. Baqytty bolyńdar!

*** *** *** ***

«Jolaýshy muraty -  jetý, qyz muraty – ketý» ekenin uǵynǵanymyzben, baýyr etinen julyp alǵandaı etip qyzyn ózge jurtqa attandyrý kimge bolsa da ońaı emes eken. Degenmen, teńin taýyp, kóńil jarastyryp, bizdiń, ıaǵnı ata-anasynyń, týǵan-týystarynyń rızashylyǵymen ketip bara jatqany kóńilge qýanysh uıalatady.

Qolymyzdan ushyp bara jatqan qyzymyzdyń qonǵan jeri qutty bolsyn! Barǵan eline tastaı batyp, sýdaı sińsin, kóp balaly ana bolyp órkenin jaısyn!

Qudaı qosqan jaryna baq bolyp qonsyn, qosaǵymen qosa aǵarsyn!

Quda-jekjattarymyzǵa aıtarym, bir-birimizge degen jyly yqylasymyz sýymaı,syılastyǵymyz joǵalmaı eki jastyń qyzyǵyna keneleıik. Toı sizderge de qutty bolsyn! Eki jas baqytty, ómirleri uzaq bolsyn!

*** *** *** ***

Shańyraqtyń shyraǵysyń shattyǵy
Tekti jerdiń tuıaǵysyń aqgúli.
Myń jyl quda bolýǵa da atty kún
Eki jasqa qudaı bersin baq búgin

Áke-shesheń, arnap otyr jyr aǵyn,
Káýsar taza móldiregen bulaǵym,
Barǵan jerge sýdaı sińip, unaǵyn,
Baqytty bol baqytty bol, shyraǵym.

*** *** *** ***

Qurmetti qonaqtar, qadirli aǵaıyn-týystar!

Búgin biz úshin kóńil asa alaburtqan kún. Kóńil – qyzymyz teńin tapty, otaýyn tigip jatyr dep, qýanyshtan shalqıdy, kóńil – álpeshtep  ósirgen qyzymyzdy qımastyqtan tolqıdy. Bul – qyz uzatqan árbir ata-anaǵa tán, osynda otyrǵan talaıyńyz bastan keshken sezim. Osyndaı sátte balańnyń dúnıege kelgen kezinen bastap ómirde  ótkenniń bári kıno sıaqty kóz aldyńa keledi eken. Dúnıege urpaq keldi dep ata-analarymyzdan bastap bárimiz qýanǵanymyz, Qyzylordadaǵy týystarǵa súıinshi habar aıtqanymyz, balanyń táı-táı basqany, byldyrlap sóılegeni, «ata», «áje», «mama», «papa» degen alǵashqy sózderi ystyq, ortaq qýanyshymyz bolǵan edi.

Qazaqtyń salty boıynsha alǵashqy bala úlkenderdiki sanalady emes pe. Qyzymyz eki jaqtyń – otaǵasynyń Qyzylordadaǵy ata-anasynyń, Almatydaǵy meniń ata-anamnyń erkeletken ortaq qyzdary boldy. Búgingi qýanyshqa qatysyp, mine, batalaryn berip otyr. Olardyń endi shóbere súıgen qyzyqtaryn kórýin tileımiz.

Endi birer sózdi qudalarǵa arnaıyn. Qudaǵı qyzymyzdy óziniń qyzyndaı qarsy alady dep sengimiz keledi. Qyzymyzdyń qadamy qutty bolyp, úılerińizge yrys ala kirsin. Eki balamyzdyń qyzyqtaryn birge toılap júreıik, biz de ata-áje bolaıyq.

Toıshy qaýymǵa aıtarymyz, kelgen qadamdaryńyz qutty bolsyn. Toı sizderge juǵysty bolsyn, ylǵı toıda kezdesip júreıik.   

---