InfoHub Logo

Japon eliniń bir qalashyǵynda qart samýraı turatyn. Ol óz shákirtterin bilimdi, aqyldy etip tárbıeleıdi. Bir kúni sabaq barysynda óziniń tártipsizdigi men qatigezdigimen elge aty jaıylǵan jaýynger keledi.

Onyń ózindik áskerı taktıkasy bolatyn. Ol qarsylasyna aýyr sózder aıtyp, ashýlandyrady. Yzalanǵan qarsylasy jekpe-jekke shyǵyp, ashýdyń saldarynan qatelikter jiberip, jeńiletin.

Bul joly da jaýynger qart samýraıdy ashýlandyrý úshin aýyr, balaǵat sózderin jaýdyrady. Alaıda samýraı oǵan qalt etpeıdi. Álgi jigit úsh ret qaıtalap kóredi. Samýraı sabaǵyn jalǵastyra beredi. Yzalanǵan jaýynger esikti teýip, ketip qalady.

Muny baqylaǵan shákirtteri samýraıdan: «Ustaz, nege onyń mundaı tártipsizdigine jaýap bermedińiz? Ony jekpe-jekke shaqyrý kerek edi!» dep yzalanady.

Dana samýraı:

— Sizge bireý syılyq alyp kelip, siz qabyldamasańyz, ol syılyq kimniń qolynda qalady? — dep suraıdy.

— Óziniń ıesinde, — dep jaýap beredi shákirtteri.

— Bul qyzǵanysh, ashý, kemsitý men mysqylǵa da qatysty. Olardy qabyldamaǵansha, barlyǵy óz ıesinde qalady, — deıdi.

Rasynda da, bireýdiń ashýly sózin kóńilge almasańyz, júıkeńiz tozbaıdy. Demek densaýlyǵyńyz da qalypty bolady. Al qyzǵanysh — ashýmen bilinetin, sosyn kekke aınalatyn yzalaný seziminiń nátıjesi, ol jaqsylyqtyń barlyǵyn jalmaıdy.Qyzǵanyshty bildirý jáne basqalardyń tómen bolǵanyn qalaý óte nashar qasıet, ishte saqtaý bolsa júrektiń kemeldenýin tejeıdi.

Bul ósıet áńgime adamdy sabyrly, keshirimdi bolýǵa shaqyrady.

---