InfoHub Logo

Bir kúni dýanbasy Qojanasyrǵa on esekti bazarǵa satyp, sonyń aqshasyna bir at satyp alýdy tapsyrady. Tapsyrmany alǵan Qoja bir úıir esekti kórshi qalaǵa aıdaıdy.

Qalanyń bazarynda esekterge tez arada alarman tabylyp, jaqsy baǵaǵa ótkizedi. Bazardy aralap júrip, alystaǵy bir aýyldyn qazysy, kári baıdyń atpen júrgenin kóredi.

— Jolyńyz bolsyn, baıeke, — deıdi Qoja.

Qazy Qoja turatyn qalaǵa bara jatqanyn aıtady.

— Ah, Qudaı tileýińizdi bersin, jarqynym, — dep máz bolady Qoja. — Men de sol jerge barýshy edim. Meni de ala ketshi. Aıaǵymdy basa alatyn emespin, salmaǵym da jep-jeńil, art jaǵyńa otyraıyn. Qudaıym seniń meıirimdi jan ekenińdi eskerip, jer jannatynyń sáýletti saraılaryn tartý etsin.

Qazy Qojaǵa zekip tastamaq bolady da, Qudaı aldyna barǵanda bir daýystyń artyq bolmaıtynyn oılap, Qojany mingestirip alady. Qalaǵa jarty shaqyrymdaı qalǵanda Qojanasyr qazyǵa:

— O, keń peıildi sopy! Sizge aıtatyn alǵysymda shek joq, taǵy bir ótinishimdi aıtaıyn! Men art jaqta otyrýǵa qorqamyn. Qulaýǵa shaq otyrmyn. Meıirimdi áketaı, aldyńa otyrǵyzshy, Qudaı seni hordyń qyzdarymen syılasyn!

Baı bul ótinishin de oryndaıdy, atty toqtatyp, Qojanasyrdy aldyna otyrǵyzady.

Qalaǵa kire bergende, dýanbasy jolyǵa ketedi.

— A, Qojanasyr, qalaı esekterińdi sattyń ba, at aldyń ba? — deıdi.

— Álbette, kórip tursyz ǵoı, — deıdi Qoja.

Sosyn art jaǵynda otyrǵan qazyǵa burylyp, túk kórmegendeı bolyp:

— Al keldik, mine! Attan tús te, alyp kelgenime raqmetińdi aıt. Jolaqy tólemeı-aq qoı.

— Áı, túsiń ne? — dep ań-tań bolady qazy. — Seni jalynyp, jalbarynǵasyn mingizip edim, munyń ne?

— Ah, endi ótirik aıtaıyn dediń be, — dep aıqaı salady Qoja. — Tez qarańdy batyr, káne, meniń jynyma tımeı! Óı, ońbaǵan! Qarańdy batyr, joǵal janyńnyń barynda! — dep dýanbasy da bas salyp qazynyń jaǵasynan ala ketedi.

Qazy buryla berip, dýanbasyny bir-aq soǵady, ol muny urady. Qyrǵyn tóbeles bastalyp ketedi. Eki baıdyń tóbelesine qarap jatpastan, Qojanasyr attyń júgenin dýanbasynyń qolyna qystyrypty da, qaltasynda qalǵan aqshasyn sıpap qoıyp, úıine qaraı bet alǵan eken.

---