InfoHub Logo

Qoja Ahmet Iasaýı jolynyń kún sanap kúsheıip bara jatqanyn ıslam áleminiń basqa aımaqtaryndaǵy dindarlar habardar bolady. Olar Iasaýı jolynyń durystyǵyna kúmán keltirip, qalaı da onyń jolyna tosqaýyl qoıýdy oılastyra bastaıda. Solardyń biri — Qorasan elinen shyqqan ataqty ǵulama Baba Mashyn edi. Ol óziniń myqty degen tórt júz shákirti men Iasy qalasyna Qoja Ahmetti izdep keledi. Iasyǵa
kelgen soń, Qoja Ahmetke jolyǵyp:

— Eldi búldirip, joldan shyǵaryp júrgen jasyl shapandy senbisiń? — dep dúrse qoıa beredi. Iasaýı ata shákirtterine:

— Bul sóılegen kezinde esinen adasady, ne aıtyp jatqanyn ózi uqpaıdy. Sondyktan buny ustap, ustynǵa baılańdar! — dep buıyrady.

Shákirtteri ustap, baılaǵan soń, onyń denesin jalańashtap dúre soǵýǵa buıyrady. Alǵashqy qyryq dúre soqqanda Baba Mashyn bylq etpeı, Alla atyn aýzyna bir ret te almaıdy. Ony biraz ýaqyt demaldyryp, taǵy da qyryq dúre soǵady. Osy kezde ǵana Baba Mashynnyń qulyndaı shyńǵyryp, «Alla!» degen jan daýsy shyǵady. Iasaýı ata dúre soǵýdy toqtatýǵa buıyrady. Muny kórip turǵan Hasan han Iasaýı atadan:

— Birinshi ret dúre soqqanda, ol bir ret te Allanyń atyn esine almady. Qyryq dúreni ekinshi ret soqqanda «Alla!» dep shyńǵyrǵan jan daýysy shyqty. Bunyń sebebi nede? — dep surady.

Iasaýı:

— Onyń arqasyna jyn-periler jabysyp alyp, alǵashqy qyryq dúreni ótkizbedi. Sol sebepti alǵashynda oǵan dúre batpaı, Alla atyn jad etpedi. Sońǵy qyryq dúre Baba Mashynnyń arqasyna tıip edi. Sondyqtan onyń jan daýysy shyqty, — dedi.

Odan keıin Iasaýı ata esin jıǵan Baba Mashynǵa qarap:

— Ózińniń qaıdan ekenińdi bildiń be? — dep surady. Ol kóz jasy kól bolyp, ádepsizdigi úshin Iasaýıden keshirim surap, táýbesine keldi. Atanyń shákirti boldy. Úsh ret qylýetke túsip, Iasaýıdiń súıikti shákirtteriniń birine aınalady.

---