InfoHub Logo

Bir patsha teńiz saıahatyna eń jaqyn qyzmetshisin de ertip shyǵady. Kemege ómirinde birinshi ret mingen qyzmetshisi «Men teńizden qorqamyn, meni keri qaıtaryńdar!» dep aıqaılaı bastaıdy. Kemedegiler «Qoı, aıqaılama, patshanyń mazasyn alma! Kemege mingennen kim ólipti?!» dep qansha eskertse de, qyzmetshi toqtamaı aıqaılaı beredi. Eshkim ony tynyshtandyra almaıdy.

Kemedegi bir aqsaqal patshaǵa habar jiberip, «Men ony qalaı sabasyna túsirý kerektigin bilemin» deıdi. Sóıtip, aqsaqal qyzmetshini áńgimege tartpaq bolady. Qyzmetshi bolsa, baıbalamyn odan saıyn údete bastaǵanynda aqsaqal ony ıterip teńizge qulatady. Sýǵa túsken qyzmetshi: «Oıbaı, ólip bara jatyrmyn! Batyp baramyn!» dep toqtamaı aıqaılaı beredi. «Ol netkenińiz, ólip ketedi ǵoı!» dep shyryldaǵan adamdarǵa aqsaqal: «Ýaıymdamańdar, ólmeıdi. Biraz qınalsyn» dep jaýap beredi. Biraz ýaqyttan soń sharshaǵan qyzmetshiniń aıqaılaýǵa da shamasy qalmaıdy. Osy kezde aqsaqal «Al, endi shyǵaryńdar» deıdi. Qyzmetshini kemege kóterip, kıimderin aýystyrady. Qyzmetshi bir buryshta úndemeı otyrady. Adamdar janyna baryp: «Baǵana qatty aıqaılap jatqan ediń ǵoı, qazir ne boldy saǵan?» dep suraıdy. Qyzmetshi teńizdi kórsetip: «Aıqaılasam meni taǵy ana jaqqa laqtyrady» dep jaýap beredi. Basynda kemede amandyqta bolýdyń rahatyn umytyp aıqaılap jatqan edi, endi sol nıǵmettiń qadirin túsindi. Sadı Shırazı hazretteri osy oqıǵany aıtyp bergennen keıin: «Beterdiń de beteri bolady, qoldaǵy bar ketpeı turyp qadirin bilý kerek» degen. Sondyqtan, odan da beterine dýshar bolmaı turyp, jaǵdaıymyzǵa shúkir eteıik. Súıikti paıǵambarymyz da bylaı degen:

«Bes nárse kelmeı turyp, bes nárseniń qadirin bilińder:

1) Kárilik kelmeı turyp jastyq shaqtyń,

2) Aýrý kelmeı turyp densaýlyqtyń,

3) Jumysbastylyq kelmeı turyp bos ýaqyttyń,

4) Kedeılik kelmeı turyp baılyqtyń,

5) Ólim kelmeı turyp ómirdiń qadirin bilińder!»

---