InfoHub Logo

Ertede bir qoıan júrek adam bolypty. Qanshama qorqaq bolsa da, onyń ózinshe qýlyǵy bar eken, óziniń sýjúrek ekenin áıeline sezdirmeý úshin kóp aıla-amal jasapty. Áıeli aqyldy adam bolsa kerek, onyń sonshalyq qorqaq ekenin sezip júripti.

Bir kúni túnde qorqaq áıelimen dalaǵa shyqsa, aı sútteı jap-jaryq eken. Jerge túsken ıne tabylatyndaı jaryq túndi kórgen qorqaq:

— Báıbishe, búgin naǵyz urlyq qylatyn tún eken, — deıdi.

— Iapyr-aı, mynaý aıtqanyń jaqsy boldy-aý, kópten jas sorpa ishsem be dep júrýshi em, al onda tez attan.

Óz sózinen ózi ustalǵan qorqaq amal joq atqa minip, qaryna quryǵyn ilip júrip ketedi.

Biraz ýaqyt ótkennen keıin jan-jaǵyna alaqtap kele jatqan qorqaq qalyń qopanyń yǵynda tebinde jatqan kóp jylqyny kóredi de, shetine baryp qaıtyp, bir tobyn bólip aıdap ketpek bop kóp júrip qalady. Bir kezde art jaǵynan túsirlegen at dúbirin estip, qorqaq qasha jóneledi. Qýǵynshy kóp uzatpaı qýyp jetip soıylmen bir salyp ótkende, murttaı ushqan qorqaq jansaýǵa aıtýǵa shamasy kelmeı buǵyp jata
beredi. Qýǵynshy atynan túsip, basyn kótermeı jatqan qorqaqty tik kóterip ap:

— Óltirem! — dep aqyrady.

Qorqaq:

— Aıtqanyńdy eteıin, taqsyr, tek janymdy qaldyra gór, — dep zar eńireıdi.

— Jaraıdy, bir joly keshirim jasadym, endi qaıtyp bul jerdi basýshy bolma! — dep qýǵynshy qorqaqty bosatyp jiberipti. Ajaldan áreń qutylǵan qorqaq atyn baılaýǵa shamasy kelmeı, qamystan jasalǵan seneniń syrtqy esiginen kire, bireý belbeýinen tartyp jibermeı turyp alady. Záresi ushqan qorqaq: — Batyr, batyr, kire sóıleseıik, — dep ishke qaraı umtylady. Osy kezde albar jaqtan kele jatqan áıeli:
«Baıǵus-aý, belińe aǵash qystyryp, keptelip turǵanyń ne? Jolyń boldy ma?» Seniń-aq qaljynyń taýsylmaıdy-aý», — dep, qorqaqtyń belbeýine qystyrylǵan quryqty alyp tastaıdy.

Esin ázer jınaǵan qorqaq áıeliniń betine qarap: — Sen qýǵynshy emessiń be, daýysyń soǵan uqsap turǵany, — depti.

---