InfoHub Logo

Ertede eki jolaýshy jigit bir sarań baıdyń úıine kelip qonypty. Baı úıi:

— Kún jaz boldy, jýan jińishkerip, jińishke úzildi, qara-ózek shaq, jigitter sý-sýan iship jatpastaryńa bolmas, — dep, olardy qara shaımen qatyrypty.

Tańerteń at ákelýge shyqqanda úlken jigit kishisine:

— Qap, bálem, myna ıttiń qorlyǵyn-aı, osy sarańnyń sazaıyn tartqyzaıyq. Qaraǵaıdaı qos qazy tur. Attanarda qaıtsek te sony ala ketýimiz kerek, — deıdi.

— Ony qalaı alamyz? — deıdi kishisi.

— Ony alý úshin attanarda ekeýimiz áldenege janjaldasa qalýymyz kerek. Men seni úıge qýyp tyǵaıyn. Al úıdegiler bizdi arashalaý úshin tysqa shyǵady. Sen sol kezde qazyny alyp shyǵarsyń, — deıdi úlkeni oǵan.

Júrer kezde sarań baı bulardy attandyra syrtqa shyǵady. Báıbishesi de esik aldyna shyǵyp, sypaıysyp kólgirsıdi. Dál osy kezde olar aıaq astynan tóbeles shyǵaryp, úlkeni kishisine qaraı qamshy ala júgiredi. Kishisi osy oraıda syp berip úıge kirip ketedi. Baı úlken jigitke arasha aıtyp, áýre bolǵanda, báıbishe esiktiń syrtynan basyp, tezirek qutylýdyń sharasyn qaraılastyrady. Kishi jigit úıge kirip, olaı qarap, bulaı qarap, qos qazyny taba almaǵannan keıin syrttaǵyny boqtaǵan bolyp:

— Aıdas-qaıdas ákeńniń aýzyn... — dep aıǵaılaıdy.

Al syrttaǵy jigit onyń qazyny taba almaǵanyn bile qoıyp:

— Apsar-japsar ákeńniń aýzyn... — degende túskıizdiń artyndaǵy japsarda ilýli turǵan qos qazyny julyp alǵan kishisi muny qaıda syıdyraryn bilmeı:

— Imas-syımas ákeńniń aýzyn... — deıdi. Muny estigen jigit úı syrtynan teptep:

— Baıeke, qoıa berińizshi, átteń, ózin omyrtqasyn opyryp, shalbaryna tyǵar ma edi? — degende, muny uǵa qoıǵan úıdegisi qos qazyny ortasynan opyryp, shalbaryna tyǵady da, úıden júgire shyǵyp, ertteýli turǵan atyna mine salyp tura qashady.

Ol qashyp bara jatyp:

— Baıeke, jibermeńiz ony. Sarańnyń sazaıyn ábden tarttyrdym, — dep aıǵaılaıdy. Aldyńǵysy belden asa bergende, úlkeni de baıdan sytylyp shyǵyp, artynan jóneledi.

Sóıtip, aılaly eki jigit sarań baıdyń sazaıyn osylaı tarttyrypty.

---