InfoHub Logo

El ishinde qudyq týraly ańyzdar kóp qoı, men ózim kórgen bir qudyqtyń jaıyn aıtaıyn dep otyrmyn:

— Ańshylyq adamǵa ne qylǵyzbaıdy, tún qatyp ańda júrip, sýsap tańdaıym keýip kele jatyr edim, bir tóbeshikke kezdestim. Atym da solaı boı uryp qyryndaı bergendeı boldy. Tóbeshikke kelip at ústinen eńkeıip qarasam, eski apan, onsha tereń emes, biraq kórinip jatqan sýy bolmaǵan soń, elemedim. Taǵy ne bar eken dep jan-jaǵyma qarap, júreıin dep edim, atym jerdi súze, moınyn jerge salyp jiberip, jerdi ıiskep bolmaıdy. Júreıin dep tebinip edim, atym kóńilsiz qozǵalyp murnyn shúıirip taǵy bógeldi. Bul ne ǵajap, elsiz-kúnsiz jerdi eski apannyń bolýy qalaı dep, nede bolsa, munda bir káp bar bolar dep atymnan túsip, saımandarymdy jerge qoıyp, belimdi sheship, atyma qarasam, atym silkinip, jadyraǵandaı bolyp kerilip tur eken. Janýarym ne sezip tur dep, keń óre salyp jiberdim de, apanǵa kelip, ishine sekirip tústim. Apanǵa túsken betimmen tómen qaraı quldılap tómendep baram, bul ne ǵajap dep jan-jaǵymdy qarmap edim, qarmanar esh nárse tappadym, joǵary qarasam, jer betinen onsha uzap ketpegen syqyldymyn. Bir kezde aıaǵym nyqqa tıip toqtaǵandaı boldy. Jan-jaǵyma qarasam, kók oraı shalǵyn quraq, neshe túrli kógal shóptiń ortasynda turmyn. Manaǵy sýsaǵanym bar, tómen jyljyp seskengenim bar, tamashalap tańyrqap turdym da, ana sýdan bir qanyp isheıin dep, ózenge kelip eńkeıe ketip, juta bastadym. Sýsynym qanar emes, jutyp jatyrmyn, bir kezde sýǵa shashalyp ketip, basymdy kóterip alyp jan-jaǵyma qarasam, jerdiń ústine shyǵyp qalyppyn. Tańyrqap alaqtap kúnge qarasam, kún túske jaqyndap qalypty. Men qudyqtyń basyna kelgende, tús aýyp kesh tartqan kez edi, sonda men osy qudyqtyń ishinde bir sótke deı bolǵanym ba dep, oılanyp turyp, jan-jaǵyma qarasam, atym jyl shyqqandaı, qur at bolyp qalypty dep sózin bitirdi.

---