InfoHub Logo

Bir baı óziniń eki ulyna eldegi qyzdardy túgeldeı tańdap júrip, balamnyń teńi osy bolar-aý degen eki qyzdy kelin ǵyp túsiredi. Baıdyń qos kelini de baıdyń ózi dárejeles dáýletti adamdardyń qyzy bolady. Jasynan ómir taýqymetin kórmegen qos kelinniń dene bitimi, júris turysy, minez-qulqy da bir-birinen aýmaıdy, bir qalypqa soqqandaı, bir anadan týyp, birdeı tárbıe alǵan adamnyń balasyndaı bolyp sáıkesedi.

Qos kelin qımyl-áreketterimen, ashyq-jarqyndyǵymen baıdyń saltanatyn tolyqtyryp, sánine-sán, abyroıyna ataq qosady. Qos kelindi kórgen árkim-aq tańdaı qaǵyp tamsanady, aýzynyń sýy quryp maqtap qyzyǵady, súısine qaraıdy. Bir-birinen bólinbesteı uqsas qos kelindi  tańdap tapqan baıdyń tapqyshtyǵyna dán rıza bolady. Dúıim eldiń nazaryn aýdarǵan qos kelin boz balalardyń da júregine shoq tastap, sezimin qytyqtaıdy. Qos kelinge degen yntyzary aýǵan bozbalalardyń sonda da joly bolmaıdy. Kúndiz jolyǵyp, til qatýdyń oraıy kelgenmen, tún jastap jolyǵýdyń sáti túspeıdi. Sezimniń ystyq lebimen júregin jalyn sharpyp kelinderine degen bóten qoldyń sozylyp, jat qushaqtyń ashylýynan kúdiktengen baı, qabaǵan ıt ustaıdy. Qabaǵan ıt esikterdiń qulyby, kelinderdiń kúzetshisi ispetti bolady. Kúndiz atty kisini attatpaıtyn ıtter túnde aýyl mańyna eshkimdi de jolatpaıdy. Qos kelinshekke sozǵan qoly jetpegen jigitter olardyń sulýlyǵyn maqtap jáne olarǵa degen arman-saǵynyshyn bildirip, «Qos kelinshek» kúıin shyǵarypty.

 

---