InfoHub Logo

Quba jonda jylqy baǵyp júrgen jylqyshy jigit jaqyn mańdaǵy aýyldardyń birine qydyryp barsa, úıde tulǵasy kóz tartyp, kóńildi baýrarlyqtaı, aq tisteri tizilgen, alma moıny úzilgen, qos burymy ókshesin soqqan bir qyz otyrady. Qyzdyń kórkine minezi saı. Jylqyshy jigittiń aman-sálemine ashyq-jarqyn únmen jaýap qaıtarady da, ornynan turyp, ot jaǵa bastaıdy. Jigit tór aldyna jaıǵasyp, otyrady da, júkke súıeýli turǵan dombyrany alyp, aqyryn ǵana sherte otyryp, eki kózin qyzdan aýdarmaıdy. Qyzdyń músini qandaı sulý bolsa, qımyly da sondaı sulý. Kerbez qımyldap ot tamyzyp, sháınek asady, qolyna túıir kirshik jýytpaıdy, ydys-aıaǵy da muntazdaı. Dastarhan daıyndap turǵan qyz jigittiń shertip otyrǵan birdiń basy, birdiń aıaǵy aralasqan berekesiz kúıin estip myrs etip kúlip jiberedi. Muny kózi shalǵan jigit talǵamsyz shertip otyrǵan dombyrasyn qoıa salyp qyzdan:

— Nege kúldiń, qurbym? Mazaǵyń boldym-aý, — dep ókinedi.

— Qyran ǵana mekendegen asqar taýda júrgen jigit talǵampaz bolmas pa edi. Qaıran dombyranyń qor bolyp, sóıleı almaı, ne aıtaryn bile almaı tili kúrmelip otyrǵanyna janym ashyǵany da. Sizdeı jigitti nege qorlaıyn? — deıdi ázildep.

Qyz sózinen utylǵan jigit bilegin túrip, dombyrasyn kókteıdi de, jańa bir kúıdi shertip ala jóneledi. Jigittiń tartqan kúıin qyz uıyp tyńdap, kúı aıaqtalǵansha qozǵalmastan melshıip turyp qalady. Kúıdi bitip qyzdyń shyn berile tyńdaǵan myna turysyna razy bolǵan jigit: «Kúı syryn uqqan adam sendeı-aq bolar! Syrtyń sulý, qımylyń kerbez be desem, naǵyz sulýlyq pen kerbezdik ishińde eken. Sol kerbezdigińe tartqan syıym osy kúı «Kerbez qyz» kúıi bolsyn», — depti.

---