InfoHub Logo

Halqymyzdyń salty boıynsha, eń aýyr qylmys, keshirimsiz kúná — qos basý. Salt buzý jaman yrymǵa sanalsa da, qos basyp, jylqy barymtalaý kezdesip turǵan. Birde kórshiles halyqtyń bir top sýyq qol suǵanaqtary el tonap, qos basý emes, qyz basý, olja salýǵa deıin baryp, eki eldiń arasyn shıelenistirgen qyrǵyn bolypty. Shyryq buzyp, yryq ketirgen toń moıyndardyń qylyǵy eki eldiń de shydamyn tozdyryp, tózimin taýysypty. Shydaı almaǵan eki jaqtyń kóregenderi bas biriktirip, kúnáharlardy jazaǵa tartýǵa bekinedi. Tóreliktiń bir jaq tizginin — Týma bı, ekinshisin Sona bı ustapty.

Tóreliktiń tórine, toptyń aldyna qunykerler men kúnáharlardy shyǵarady. «Shyraqtarym kim edi, kózin tigip, aryńa tıgen, namysyńdy jer etken, júrekke jara salyp, aq júzińdi qorlaǵan. Tap basyp tany da, dál kózdep kózinen at kiriptardyń. Jebeń tıip kózi shyqsa, qoly synyp, basy jarylsa, júrekten ótip, demi bitse — aryńnyń sadaǵasy. Jaza basyp múlt ketseń — janyńnyń sadaǵasy. Kúrmelgen jip, kúıingen júrek jarasynyń sheshimi, tóreligi sol bolar, shyraqtarym, sadaǵyń berer jazasyn...» — dep, Sona tóreliktiń tórinde turǵan on eki qyzǵa qoramsaqty usyna bergen kezde, kek kernegen yzaly qyz Gúlsana sýyrylyp alǵa shyǵady. Bolǵan jaǵdaıdy shubyrtyp aıta kelip, ashý qysyp býlyqqan ol sadaǵyn shirene tartyp, uzyn soıyl ur da jyq qara doıyrdy murttaı ushyryp túsiripti. Kúı atasy atanǵan Bájeń osy oqıǵanyń jelisin, onyń kúıinish-súıinishin, tóreligin «Qosbasqan» dep at qoıyp, dombyranyń kómeıinen osylaısha kúı sóıletipti.

 

---