InfoHub Logo

Qorqyt jer betindegi jan-janýarlardyń barlyǵynyń tilin biledi eken. Bir kúni Jelmaıasymen kele jatsa, bir kıiktiń mańyraǵan daýsy qulaǵyna shalynady. Ol: «Qos laǵym jetim qalady-aý, shópke aýyzdanbaǵan sorlylardyń kúni ne bolmaq? Tym bolmasa, sońǵy ret emizip, ıiskep, maýqymdy basyp ta qala almadym», — dep zarlaıdy. Qorqyt jan-jaǵyna baǵdarlap qarasa, bel astynda tigýli turǵan qarasha úıdi kóredi. Kıik sol úıdiń aldynda kógendeýli tur eken. Kıikke jany ashyǵan Qorqyt úı ıesine: «Myna jazyqsyz janýardy jiber, óz betimen tamaq taýyp jeýge aýyzdanbaǵan egiz laǵy bar eken, obalyna qalma», — deıdi. Qorqyttyń bul sózine qulaq aspaıdy.

— Onda men kıikti bosatqanyń úshin aqysyn tóleıin, — dese, úı ıesi:

— Joq, men munyń sútin saýyp iship otyrmyn, keshke soıyp jeımin, — dep oǵan da kónbeıdi. Basqa amaly qalmaǵan Qorqyt:

— Bolmasa kıiktiń ornyna meni kepildikke al, ony bosat. Laqtaryn taýyp alyp, emizgennen keıin qaıtyp keledi. Eger sol ketkennen oralmasa, meniń Jelmaıamdy soıyp je, — deıdi.

Úı ıesi kıikti bosatyp jiberedi. Kıik baılaýdan bosana salysymen, taý-tasty kezip júrip laqtaryn taýyp alady. Olardy emizgennen keıin, qas qaraıa qaıtyp keledi. Osy oqıǵadan keıin Qorqyttyń «Baılaýly kıiktiń zary» kúıi dúnıege kelgen eken. Bul shyǵarmasynda kúıshi qataldyq pen meıirimdilik, jaýyzdyq pen qaıyrymdylyq jaıynda tolǵanady.

---