InfoHub Logo

«Bala tárbıesi – barshaǵa ortaq»
Shyr etip sábı dúnıege kelgen sátten bastap ata - ana aldynda názik te qıyn úlken qoǵamdyq mindet turady. Ol - bala tárbıesi. Mektep pen otbasy qoǵamnyń áleýmettik ınstıtýty retinde balanyń damýy men qalyptasýynyń mańyzdy bir baǵyty bolyp tabylady. Sondyqtan da ata - anamen jumysty uıymdastyrýdyń belsendi ádisterin izdestirý jáne ony tıimdi qoldaný mekteptiń mindeti. Ol tárbıe prosesinde júzege asady. Tárbıe prosesine qatysýshylardyń is - áreketi men qarym - qatynasy pedagogıkalyq yqpal etý arqyly júzege asady. Tárbıe mazmuny otbasynan bastaý alady. Búgingi tárbıe úrdisinde dástúrli ádisterdiń ornyn kreatıvti oılaýǵa túrtki bolatyn jańa pedagogıkalyq ádister men ozyq aqparattyq tehnologıalar almastyrdy. Bul bir jaǵynan muǵalim men ata - ananyń yntymaqtastyǵyn arttyrsa, ekinshi jaǵynan tájirıbeni ómirde qoldana bilý múmkindigin qalyptastyrady. Mekteptiń pedagogıkalyq úrdisi kúrdeli júıeden turady. Muǵalim, oqýshy jáne ata - ana sol prosestiń sýbektileri bolyp tabylady. Tálim - tárbıedegi jarasymdylyq - birlesip, yntymaqtasyp jumys istegen jaǵdaıda ǵana úılesimdilik tabady.
Buzaqylyqtyń basy bos júrýden bastalady. Keıde sabaqtan jıe qaldyrýǵa ár túrli syltaýlardy úlkenderdiń ózi úıretip otyrǵanyn ańǵarmaı da qalýy múmkin. Jas shybyqty qalaı ekseń, solaı ósedi ǵoı. Iá, «Uıada ne kórseń ushqanda sony ilersiń», demekshi ata - ana tárbıesi bala ómirinde úlken iz qaldyrady. Balanyń boıyna barlyq jaqsy qasıetterdi darytý, tipti janynda júrgen dostaryna deıin mán berý, tabıǵat syılaǵan daryny bolsa damytý, durys bilim alýyna jaǵdaı jasaý - ata - ananyń basty tárbıesinde alǵashqy ustaz - ata - ana. Januıada tárbıe balaǵa sózben, teorıamen damymaıdy, úlkenderdiń úlgisimen sińedi.«Ákege qarap ul óser, sheshege qarap qyz óser»deıdi halyq danalyǵy. Bala kishkentaı kezinen - aq ár nársege áýestenip úlkenderge kómekteskisi keledi. Buǵan keıbir áke - sheshe«jumysymdy bógeısiń, istep jatqan isimdi búldiresiń» dep urysyp jiberýi múmkin. Bul qate túsinik. Kerisinshe, óziń jumys istep júrgende balanyń qolynan keletin isine jaǵdaı týǵyzyp, onyń úırenýine kómektesken oryndy. Tipti balaǵa bergen tapsyrmańyzdyń aıaǵyna deıin oryndalýyna tózimdilikpen baqylaý kerektigin de umytpaǵan jón. Óstip balanyń birte - birte eńbekke degen bolashaǵyna jol ashylady. Ári istegen isiniń uqypty da tyndyrymdy oryndalýyna baǵyt beresiz. Balanyń jaqsy isin madaqtap, terisin oń etip túsindirip otyrsa, ol da eresekterdi syılap, kez kelgen tapsyrmasyn oryndaýǵa qarsylyq bildirmeıdi. Orynsyz urysý, zeký, suraqtaryna dóreki, kelte jaýap berý nemese ádil talap qoıa almaý ata - ananyń bedelin túsiredi. Ata - ana - bala tárbıesindegi basty tulǵa. Sondyqtan áke de, sheshe de balalarynyń jan dúnıesine úńilip, minez - qulqyndaǵy erekshelikteri jetik bilgeni jón.
Qorytyndylaı kele, tárbıe úrdisiniń bir taraýy ata - analarmen jumys desek, otbasynan bastalatyn tárbıe mektep ómirinen jalǵasyn tabady. Búgingi maqsat - árbir balaǵa túbegeıli bilimmen mádenıettiń negizderin bilý jáne olardyń jan – jaqty damýyna ata - ana, mekteptiń jaǵdaı jasaýy bolyp tabylady. Ata - analar mekteppen tyǵyz baılanysta bolý kerek. Balany oqytý men tárbıeleýdiń ádis - tásilderi jáne túrleri ata - analarmen muǵalimderge paıdasy tıer degen oıdamyn. Bala, ata – ana jáne mektep osy úsh odaq birlese jumys atqarǵanda ǵana tabysty nátıjege qol jetkize alamyz. Nazarlaryńyzǵa rahmet!