InfoHub Logo

Báımenniń sharshy topta Sapaq sıaqty tóbe bıdi kóptiń aldynda sógipti degen sóz bar. Onyń mánisi: Báımen bir top adamdarymen jolaýshylap kele jatyp aldynan atylǵan myltyqtyń daýysyn esitedi. Tezirek júrip kelse Sapaq aýylynyń bir mergeni kıikti atyp alyp otyrady. Báımender kelýine mergen jigit kıikti bulardyń qanjyǵasyna baılaıdy. Báımen:

— Kıigiń aram, astyńa basyp jatyrsyń. Aram kıigińdi Sapaqqa aparyp ber, sol jesin, — dep ilgeri júrip ketedi. Mergen jigit kıikti Sapaqqa berip jatyp Báımenniń sózin bıge aıtady. Sapaq myrs etip kúlip jiberedi. Aradaǵy ósekshiler Báımenge: «Sapaq seniń qyzyńdy balaǵattapty» dep jetkizedi. Báımenniń kóptiń aldynda Sapaqty sógýiniń sebebi osy eken. Ósekshiniń kesirinen ataqty eki bı osylaısha ókpelesip tarasady.

Arada bir-eki jyl ótip Quldyqtan Báımen jeńilip han qasynan Syrǵa kóship kele jatqanyn Sapaq estip otyr edi. Túnimen kóshken kósh sáskelete belgili bir qudyqqa kelip kólikterin tynyqtyryp alý úshin toqtasa, qudyqtyń basynda túıe sýǵaryp úlken bir qarıa turady. Oǵan Báımen syrtynan kelip sálem berse, qarıasy Sapaq bolyp shyǵady. Báımen burylyp kete almaı, Sapaqqa jaqyndaı túsip:

— Assalamýmaǵaleıkým, Sapeke!, — deıdi. Kózin alaqanymen kólegeılep Báımen ekenin anyqtap alyp Sapaq:

— Ýaǵaleıkým ýassalam!
Báımen bı kóshtiń be syrǵa sıyryńmen,
Baqshaqtan Quldyq shyqty ma búıirińnen.
Qorada qasqyr soqqan qara aıǵyr ediń-aý,
Keshe túste dónen qýyp shyqty ma úıirińnen.
Aqyry zıan taýyp jer aýdyń ba,
Tákappar minezińniń súıirinen.
Qansha myqty bolsań da osy soqqy,
Ótip ketken shyǵar-aý súıegińnen! —
deıdi. Sonda Báımen atyn baýyrǵa osyp-osyp jiberip:

— Sý ishpeseń, ý ish! Keshe túste Quldyqtan oq tıip omaqassam, búgin seni sýaramyn dep Sapaqtyń ajal oǵyna tap boldym. Endi meniń de ómirim uzaqqa barmas, — dep, Syrǵa kóshimen júre beripti.

---