InfoHub Logo

Qulataıdyń Sulýtóbe selposyna barǵaly jumbaqty jaǵy kóbeıip ketti. Onyń júrgeni de, turǵany da, eń arǵysy kúlgeni de jumbaq. Ony qyryq aýdarsań da qyryn tappaısyń, Qulataı jup-jumyr. Ásirese sońǵy kezde jumyrlanyp ketti, aýzy-murny joq, biteý. Qaı jaǵynan kelerińdi bilmeısiń, turǵan boıy suraq. Birin sýyrsań, biri shyǵady, birinen biri iri shyǵady. Onyń bul sıqy qarap: "Osynyń ózi saýda qyzmetkeri me, álde saýdager me?" dep te qalasyń, qapelimde sheshýin tappaısyń. Áıteýir Qulataıdyń joly qısyq, jóni túzý emes. "Júrse izi, baýyzdasa qany joq" deıtin jumbaq sekildi, jup-jumyr bolyp júgirip júrgen bireý...

Qulataıdy shynynda da "júrse izi" joq qaıyqqa da teńegiń keledi. Óıtkeni Qulataı selponyń eń dúnıesiniń ortasynda, ottaı shalqyp, qazdaı qalqyp júzip júr. Onyń "qoly da uzyn", qalaı sozsa solaı jetedi. Qolynyń biri qaladaǵy bazda jatsa, endi biri aýdandyq tutynýshylar odaǵynda jatady. Taǵy biri Sulýtóbe selposynyń ózinde turady. Qaı jaǵynan tartsań da sýyryp ala almaısyń, ábden jymdasyp, barynsha qıýlasyp qalǵan. Qulataıdy jumbaq adam deıtinimiz de osy.

Onyń nesibesine selponyń predsedateli raıshyl, aýdandyq tutynýshylar odaǵynyń predsedateli úndemes bolyp kezdeskenin kórmeısiz be? Olar kórse de kórmeı, bilse de bilmeı, kózderi baqyraıyp, muryndary salbyrap otyryp alǵan-dy. Áıtpese aldarynda jatqan faktýralardy tekserip, burys - durysyn aıyratyn saýattary bar emes pe? Árisin qoıyp, berisin aıtqanda, oblystyq tutynýshylar odaǵy saýda ba tasynyń N2 skladynan N7 faktýramen Qulataı "IJ" markaly tórt motosıkl aldy. Onyń ekeýi ornynan qozǵaldy da, joq boldy. Ushyp ketti me, álde bireýdiń qaltasyna túsip ketti me? Ony zerttegen eshkim joq. Qaıta olar aldyndaǵy faktýrada motosıkldiń tórteý ekenin kórip qalmaıyn degendeı kózin juma qoıdy.

Qulataı bazdan alǵan taǵy bir motosıkldi jutyp jiberdi.

Motosıklder men paltolar joq bolyp jatqanda ún degenderiń buıym bolyp pa? Ótken mart aıynda sovhozǵa i ıisti jıyrmalaǵan tonna undy "úshti – kúıdi men" qurtyp jiberdi. Unnyń arasynda 60 metr masaty da ketti. Biraq arty qaıyrly boldy, qatty da emes, jaı soǵyspen jaıbaraqat qana jabyldy da qaldy, janyn aýyrtqan joq.

Qulataı syrtqa jumbaq bolǵanmen aýdandyq tutynýshylar odaǵy predsedateliniń daıyndaý jónindegi orynbasaryna jumbaq bolýy múmkin emes. Óıtkeni ol bilmeıtin Qulataıdyń qaltarysy joq. Qulataıdyń jutqynshaǵy bir búlk etse, olardiki eki búlk etedi degen qaýeset bar. Áıtpese taýdaı nárseler tarydaı domalap taltúste, sharshy toptyń (bazardyń) ortasynda satylyp jatar ma? Jany ashyrdyń joqtyǵynan bolǵandyq emes pe?

Qulataı juta bilse, jutqyzýdy da biletinderdiń biri. Keıde "Mashına bos júgirmesin dep sala salyp edik" degen syltaýmen bastyqtardyń úılerine sekseýildi de túsirip ketedi. Keıde: "Ózimizdiń organ pishenimiz edi" dep shópti de ákelip tastaıdy.

Mine, osynyń bári Qulataıdy jumyrlandyryp, qaı jaǵynan kelerińdi bildirtpeı, biri qaqpaq bolsa, biri jappaq bolyp otyrǵandyǵyn aıtyp tur. Árıne, Qulataıdyń bul sumdyǵyna suqtana qaraıtyn bastyqtary bolmasa, onyń suǵanaqtyǵy óristeı beretini daýsyz. Endeshe Qulataıdy jumbaq kúıinde júrgize bermeı, saýda mańynan alastaý kerek. Kóp jumbaqtyń sheshimi osynda ǵana tur.

---