InfoHub Logo

Dosjan aǵaıǵa kolhozdyń Qońyr ógiziniń júris-turysy jaqpaı-aq qoıdy. Qońyr ógiz tuıaǵy syrtyldap, tanaýy pyshyldap, urǵanǵa júrmeıtin anturǵan. Ásirese, qońy qalyńdaǵan saıyn qyńyr ketetindi shyǵardy. Ol ol ma, keıde tipti qarap turyp topyraq shashyp, ókiretindi taýyp aldy.

Dosjan buǵan alǵashqyda "Basyńa kórinsin, soıylǵyr" dep júrdi de, kúnderde bir kún birden baýyzdatty da tastady. Eń arǵysy etin de jegizbedi, sattyryp jiberdi. "Mundaı anturǵandy satyp jiberýden basqa laj joq" dep kesip, pishti. Biraq Dosjan: "Eti aram bolǵanmen puly adal" dedi de qaltaǵa salyp aldy. Báribir Qazalynyń qalasynda qalatyn pýl" dep eseptedi Dosekeń.

Ógizdiń bári ógiz emes pe? Dosekeń qaladan qaıtyp kelse Qyzyl ógizdiń de minezi unamaıtyn bolyp qalypty. Kózin alartyp qaraı ma, qaıtedi. Súzgisi keletin túri bar. "Sıyr sıpaǵandy bile me?" dedi de oǵan da qaharyn tókti. Qońyr ógizdiń izimen Qyzyl ógiz de jónep berdi.

Sonymen Dosjan aǵaıdyń úsh áıelinen bes-alty bala bar. Biraq biri úıde, biri túzde bolyp bastary qosylmady. Dosjan onyń da lajyn tapty. Bárin jıyp "naqsúıeriniń" atyna jazdyrdy da, "kóp balalar" qataryńda úkimettiń aqshasyna ıe boldy. Biraq ol aqsha da bitti.

"Taı atqa, at muratqa jetkizer" degendeı jas qyzdar boı jetti. Dosjan bir qyzyn kúıeýge berip, órkeshi baladaı qyzyl nar men tory jorǵaǵa ıe boldy.

— Jubandyqtyń Dosjany osynyń bárin kimge súıenip isteıtinin bilesińder me? — deseń:

— Bilemiz! — deıtinder ekiniń birinen tabylady. Biraq, aýdanda Dosjandy áńgime etseń, kórine kózge:

— Táıiri, bu da qylmys bolyp pa? — dep, qaqpaq bola qalatyndyǵy bar. Sonyń sebebimen Dosekeńniń qylyqtary men bylyqtary basylyp qala beredi de, jabýly qazan ashylmaıdy.

Sondyqtan da aldymen ashylatyn nárse qaqpaq, sonan soń qazandy tappaq onsha qıynǵa túspes dep oılaımyz.

---