InfoHub Logo

Qazaqtyń bir oqyǵan jigiti Jurymbaı aýylǵa ókil bolyp keldi. Ol ár kúni jatarda úıyqtaı almaı ár nárseni bir oılap, birden birge túıilip, oıǵa súńgı beretin ádeti edi. Sonan soń áldebir nárseni shyǵaryp kelse de, kelmese de ózim tapqan jańalyǵym dep aıtyp maqtanyp júretin. Naq osyndaı bir kúni oı túbine jete almaı jatqanda erteń kolhozdyń sharýashylyq meńgerýshisinde jumysy bary esine túsip, oǵan qaladan áldebir naýqanǵa jetispeı jatqan bólshekti alyp kelýi kerektigin usynbaq boldy.

— Áı, osy zavhozdyń ózi bir salaqtaý adam eken, — dep oılady. Shynynda da Jurymbaıdyń oılaǵanyndaı ol ári salaqtaý, ári saýaty shamaly qara tókpek adam bolatyn. Jurymbaı damylsyz oılaı berdi.

— Ia, ıa, zavhoz, zavhoz! Zavhozy nesi osylardyń?— dep oılady ol,— Zavhoz. «Zavedýshıı hozáıstvom» degen sóz toı oryssha. Ony nege qazaqshalaýǵa bolmaıdy? Nemene bárine jetken qazaq tili osyǵan jetpeı, osyny aýdara almaı qalyp pa!? Zavedýıýshıı — meńgerýshisi, al hozáıstvom — sharýashylyǵyn, sonda týra aýdarma «meńgerýshisi sharýashylyǵyn» bolyp shyǵady. Joq-joq. Orystar zavedýıýshıı hozáıstvom dep tutas aıtsa kózi kórmep pe! Sondyqtan zavhoz degendeı ony da qysqartý kerek qoı. Taptym, taptym. Alǵashqy býyndardy alamyn. «Meńshar!» Jo-joq. Bul da teris. Aldymen anyq qazaqshylap alý kerek. «Meńgerýshisi sharýashylyǵyn» degen bolmaıdy. «Sharýashylyq meńgerýshisi!» Mine naǵyz qazaqsha, qatyp ketti. Endi qysqartýym kerek. Sonda bul alǵashqy aıtqanymdaı «meńshar» emes, «sharmeń» bolady. Oı pále! Áı, Júkeńniń basy jumys isteıdi-aý! Jaraısyń, Júke, jaraısyń. Shynynda, osy túbinde qazaqtyń Qaramzıni men bolyp ketip júrmeıin.

Tańerteń ókil qyrman basyna keldi. Ol qolyndaǵy júgenin kolhozdyń sharýashylyq meńgerýshisine berdi. Sóıtip:

— Sharmeń! At ákel,—dedi. Anaý júgendi alǵanymen jaqtyrmaǵandaı bir qarap qoıdy. Ol bir nársege kúıbeńdep áli de kete qoımady. Sondyqtan ókil ekinshi bireýdi jumsady. Onyń «júgenińiz qaıda» degen suraǵyna Jurymbaı:

— Sharmeńge berdim,— dedi: Anaý túsine almaı ańyryp turyp qaldy. Jurymbaı qaıta aıtty: Sharmeńge berdim, sharmeńge.

— Kimge?

— Sharmeńge!

Osy kezde kolhozdyń sharýashylyq meńgerýshisi tútep «á, ákeńniń aýzyn... óziń sharmen,»..— dep júgenmen Jurymbaıdy salyp ketti.

---