InfoHub Logo

Ardaqty aǵaıyn! Qadirli qonaqtar! Qymbatty qýanysh ıeleri!
Qazaqta «balaly úı – bazar, balasyz úı – qý mazar» degen qanatty sóz bar. Kóktegi jańa bir juldyz jarqyraǵandaı, adamzat qataryna taǵy bir náreste qosyldy. Baýy onyń berik, yrys oǵan serik bolsyn! Tezirek er jetip, qolqanattaryńa aınalsyn! Oǵan da, ózderińe de bastaı baq, shashtaı dáýlet bersin! Qýanysh qutty bolsyn! Uzaǵynan súıindirsin!

*** *** *** ***

Aınalaıyn baýyrlarym meniń! Asa qadirli dosym!
Bala – adamnyń baýyr eti. Adamnyń bar qyzyǵy – balany meıirlene ıiskeý bolsa, sol baqytqa búgin ózderin de jetip otyrsyńdar. Beıbit eldiń aq kógershini bolyp ómirge ińgálap kelgen jas náresteniń shildehana toıy qutty bolsyn!
Senderdiń shańyraqtaryńdy qýanyshqa bólegen dúnıege kelgen sábıdiń baýy berik bolsyn, ómir – jasy uzaq bolsyn. Ata-anasynyń  úmitiń aqtaıtyn, mańdaıy jarqyraǵan ul bolyp er jetsin!

*** *** *** ***

Jaryq dúnıege shyr etip kelgen sábıimizge anasynyń kórkin bersin, ákesiniń bórkin bersin, ájesiniń aqyl-oıyn bersin, atasynyń abyroıyn bersin! Óssin – ónsin, jamandyq kórmesin, ósken soń erlesin! Qýanysh qutty bolsyn! Bárimizge juǵysty bolsyn!

*** *** *** ***

Alla balany mańdaıynan súıse – ol ataqty ǵalymǵa aınalady eken, erninen súıse – odan áıgili sheshen shyǵady desedi, aıaǵynan súıse – belgili bıshi, qolynan súıse – keremet  kúıshi bolady-mys. Allanyń balaǵa kózi oń bolsyn, bizdiń tilegimiz sol bolsyn! Ómiri uzaq, nesibesi zor bolsyn! Qysqasy, kúleıik, oınaıyq, toılaıyq – qoımaıyq!!!

*** *** *** ***

Balamyzdyń baýy berik bolsyn! Dáýlet-yrys oǵan serik bolsyn! Mańdaıynan juldyzy jarqyrap, eliniń alǵa aparar ýázir bolsyn, osynaý júkti moınymen kóterýge ózi de ázir bolsyn! Deni saý bolsyn, shyqqany taý bolsyn!

*** *** *** ***

Dúnıede tuńǵysh perzenttiń kelýi árbir otbasy úshin úlken qýanysh. Ómirge jańa kelgen sábı – keshe ǵana úılený toıyn ótkizgen jas-jubaılardy «áke-sheshe», al olardyń ata-anasyn «ata-áje» atandyryp, osy bir shańyraqqa erekshe bir meıirimdiliktiń nuryn syılaıdy.
Olaı bolsa ómirge kelgen jas sábıdiń áke-sheshesine, atasy men ájesine myqty densaýlyq tilep, tuńǵyshtaryńyzdyń baýy berik bolsyn deımiz. Al jas sábıge tilerimiz: ata-anasynyń úmitin aqtaıtyn mańdaı jarqyraǵan ul bolyp er jetsin! Ómirli bolsyn!

*** *** *** ***

Qazaqta «balaly úı – bazar, balasyz úı – qý mazar» degen sóz bar. Dúnıege sábıdiń kelýi - ómirdiń bir ǵanıbet – ǵajaby deýge bolady.
Dostym, seni áke bolýyńmen, al jaryńdy ana bolýymen quttyqtaımyz. Senderdiń shańyraqtaryńdy qýanyshqa bólegen dúnıege kelgen sábıdiń baýy berik bolsyn, ómir jasy uzaq bolsyn. tezirek er jetip, senderdiń qolqanattaryńa aınalsyn. Artynan ini-qaryndastaryn erte bersin! Endeshe osy kishkentaı ómirdiń jalǵasy jáne ony dúnıege keltirgen ata-anasy úshin!
Uly ǵulamalar «árbir adam dúnıege kelgende aspanda jańa bir juldyz janady» dep aıtqan eken.
Mine, dál qazir túngi aspanǵa nuryn shashyp turatyn juldyzdardyń sany bireýge kóbeıdi. Jaryq dúnıe esigin jańa ashqan mynaý perishtemiz de sol juldyzdaı jarqyrap ortamyzǵa qýanysh alyp keldi.
Ómirge kelgen sábıimizge Alla taǵalam myqty densaýlyq, baqyt, uzaq ómir bersin. Aman-esen er jetip, eliniń aıtýly azamaty bolsyn!

*** *** *** ***

Qadirli qonaqtar! Búgingi qýanyshtyń qymbatty ıeleri!
Osy aq dastarhan basyna adal nıetpen jınalyp otyrǵan qonaqjaı halqym, búgingi toıdyń qandaı toı ekeni barshańyzǵa málim. Sondyqtan mynaý zamannyń,beıbit eldiń aq kógershini bolyp ómirge ińgálap kelgen jas náresteniń shildehana toıy qutty bolsyn!

*** *** *** ***

Bala – adamnyń baýyr eti. Birin-biri jaqsy kóretin eki adamnyń jany men táninen jaralǵan bala erekshe ystyq. Otbasy músheleriniń tatý-tátti ómir súrip, bir-birine  meıirimmen qaraýyna negiz jasaıtyn alǵy sharttardyń biri – olardyń bir-birine degen súıispenshiligi bolsa, ekinshi shart – perzent. Sondyqtan atamyz qazaq  «balaly úı – bazar» dep oryndy aıtqan. Adamnyń bir qyzyǵy – balany meıirlene ıiskeý úlken baqyt bolsa, sol baqytqa mine, búgin sender de jetip otyrsyńdar.
Sol sebepti men senderge toılaryń toıǵa ulassyn, ómirdegi kóretin qyzyqtaryń kóbeıe bersin demekpin.
Meniń osy aıtqanym toı – tilegim úshin dastarhandaǵy dámnen alyp otyryńdar!

*** *** *** ***

Kók aspandaǵy juldyzdarǵa jańa bir juldyz, jerdegi adamzat qataryna taǵy bir adam qosyldy. Ómirge shekesi torsyqtaı sábı keldi!
Beıbit eldiń aq kógershini bolyp dúnıe esigin ashqan sábıimizdiń baýy berik bolsyn!
Mańdaıy jarqyraǵan ul bolyp er jetip, ata-anasynyń ǵana emes, búkil eliniń maqtanysh eter Azamatyna aınalsyn!
Qýanysh qutty bolsyn, uzaǵynan súıindirsin! Árbir basqan qadamy ońǵarylyp, Qydyr ata qoldap júrsin.

*** *** *** ***

Kishkentaıyńyzdyń bal qylyǵyn qyzyqtap, analyq meıirimińizge bóleı berińiz. Shańyraǵyńyzdan shattyq-qýanysh, júzińizden kúmis kúlki arylmasyn!

*** *** *** ***

Náresteli bolǵan qýanyshyńyz qutty bolsyn! Dúnıege shyr etip kelgen altyn asyqtaı ulyńyz  keleshekte qyrandaı alǵyr, suńqardaı ór, arystandaı aıbatty, jolbarystaı qaıratty, qasqyrdaı ójet jigit bolyp ósip, áýletińizdiń jarqyn jalǵasy, shańyraǵyńyzdyń laıyqty ıesi bolar erge, eliniń arqa súıer eńsesi bıik azamatyna aınalýyn tileımiz. Jas sábıdiń ata-anasy retinde jubaıyńyz ekeýińizge denniń saýlyǵy men jannyń jylylyǵyn, taýdan bıik ákelik júrektiń qamqorlyǵy men teńizden tereń analyq júrektiń meıirimin tileımiz. Shańyraqtaryńyz shattyqqa, qushaqtaryńyz qýanyshqa tolsyn! 

*** *** *** ***

Qutty bolsyn besigiń
Artyq bolyp nesibiń.
Dastarhanyń jaıylyp,
Ashyq bolyp  esigiń,
Óre bersin balalar.
Dushpandaryń bolmasyn,
Kúnshildikpen tabalar.
Alpamystaı taǵy da,
Ul artynan ul tapqyn.
Jarqyraǵan Sholpandaı,
Qyz artynan qyz tapqyn.
Qutty bolsyn búgingi,
Shildehana toılaryń.
Tilekterin qabyl bop,
Oryndalsyn oılaryń.

*** *** *** ***

Balanyń kóńili jaı bolsyn,
Myń jylqyly baı bolsyn.
Aıdaǵany qoı bolsyn,
Shaınaǵany maı bolsyn!
Azyn-aýlaq dáýleti
Kúnde ózine toı bolsyn.
Jurtta qalǵan juryny
Domalap kelip qoı bolsyn!
Jurtta qalǵan týlaǵy
Týlap kelip taı bolsyn.

*** *** *** ***

Aıdary kún súıip, kúnge kúısin mańdaıy!
Jotasyna maı sińip, qurǵamasyn tańdaıy!
Eri bolsyn eliniń, ar-namysyn saqtaıtyn!
Gúli bolsyn jeriniń, shań-tozańǵa batpaıtyn!
Aldy bolsyn teńiniń, ımenbesten attaıyn!

*** *** *** ***

Meken etsiń januıańdy jaqsylyq,
Óse bersin bóbekteriń  shat kúlip.
Ortaımasyn qýanyshyń, baqytyń,
Áldılesin jaqsy tilek, tátti úmit.

*** *** *** ***

Qutty bolsyn nesibiń, artyq bolsyn nesibiń!
Dastarhanyń jaıylyp, ashyq bolsyn esigiń!
Qutty bolsyn búgingi shildehana toılaryń,
Tilekteriń qabyl bop, oryndalsyn oılaryń!

*** *** *** ***

Sábı kóńili jaı bolsyn, myń jylqyly baı bolsyn!
Aıdaǵany taı bolsyn, shaınaǵany maı bolsyn!
Azyn-aýlaq dáýleti kúnde ózine toı bolsyn,
Jurtqa qalǵan juryny domalap kelip qoı bolsyn!
Jurtta qalǵan týlaǵy týlap kelip taı bolsyn,
Taı bolsyn da týlasyn – bir qurdasy surasyn...

*** *** *** ***

Nárestemiz ómirli bolsyn,
Turmysy onyń kóńildi bolsyn! 
Ata-anasyna meıirli bolsyn,
Aǵaıyn-týysqa peıildi bolsyn!
Ónege peıilge zeıindi bolsyn!
Tula boıy tunǵan óner bolsyn,
On saýsaǵy maıysqan sheber bolsyn!
El qorǵaıtyn batyr bolsyn,
Shyndyq aıtar aqyn bolsyn!
El bıleıtin ákim bolsyn,
Ádildikke jaqyn bolsyn!
Halqym degen júregi bolsyn,
Jurtynyń qamqor tiregi bolsyn!
Abyroıy órlesin,
El aldynda erlesin!
Qazaq úshin terlesin,
Esh jamandyq kórmesin.

*** *** *** ***

Bala baýy berik bolsyn, anasyna serik bolsyn!
Azamat bop er jetsin, aqsaqal bop tórletsin!
Adam bolsyn kórikti, ǵumyry uzaq berik-ti,
Qolqanaty kóp bolyp, erte bersin serikti!
Eline bop ardaqty, minezi de salmaqty,
Óneri órlep jan-jaqty –
Osy aıtqanym tez kelsin, Táńir berip zor baqty!

*** *** *** ***

Sábıimiz súıkimdi bolsyn, óner-bilimge ıkemdi bolsyn!
Báıterekteı boıshańdanyp óren, órshil, órkendi bolsyn!
Jaqsy joldy tańdasyn, jamandyq tálim almasyn –
Danalardyń dástúrin jańalasyn, jalǵasyn!
Shuǵylaly shýaq kún keshsin, basyn sur bult shalmasyn!
Qos topshysy talmasyn, qyrandaı bıik samǵasyn!
Ary adal, jany jaz, qurbysynan qalmasyn!

*** *** *** ***

Úıińizdiń bólmesin sábı úni kernesin,
Ul erjetip, qyz boıjetip, bilimge qulash sermesin.
Alýan óner úırenip, dál bassyn kóńil pernesin,
Qyzmet istep eli úshin abyroıy órlesin.     
Sol bedelin qorǵaıtyn, ómirden tapsyn teńdesin,
Baqytty, uzaq jyl jasap, jamanshylyq kórmesin.
Ósip-ónip órkendep, bar ortada tórlesin -     
Qysqasy, urpaq myń jasap, jaryǵyńyz sónbesin.

*** *** *** ***

Atyń-atyń atý bol, týystarmen tatý bol!
Aıdaǵysyz maldy bol, aǵaıynnyń aldy bol!
Baǵanaly taıdaı bol, jemis berer baýdaı bol!
Jaqsylyqqa semiz bol, shaǵalaly teńiz bol!
Dushpan qýsa jetpesin, qaz ústińnen ótpesin!
Taǵdyr ony teppesin, yrys-dáýlet ótpesin!

*** *** *** ***

Ákeniń tilegi

Balam, ozyq óren bol, qyz kózindeı tereń bol,
El synasyna – qulaq sal, al maqtasa – kereń bol!
Ádildikke jýyq bol - áljýaz bop týypty ol,
Kún kózindeı jyly bol, kók súńgideı sýyq bol!
Qattap tursa tystan qol – basqarýǵa usta bol,
Aqyl-oıǵa uzyn bol, qyzyl tilge qysqa bol!
Jaqsylyqqa shegen bol, jamandyqqa shemen bol,
Óz ákeńnen bıik bol, óz ulyńnan tómen bol!
Qaraly eldiń tańy bol, jaraly eldiń jany bol,
Sónip ólme, ólseń de - óz otyńa janyp ól!

*** *** *** ***

Ananyń tilegi

Aınalaıyn, balashym, aman bolsyn anashyń!
Aman bolsyn ákeń de, aǵataıyń, táteń de!
Óziń tátti baldaı bol, tamyry tereń taldaı bol!
Bıik zańǵar taýdaı bol, jemisi mol baýdaı bol!
Ómir jolyn tańdaı bil, týralyqty qoldaı bil!

*** *** *** ***

Aǵaıynnyń tilegi

Bir úıdiń balasy emes – kóp úıdiń sanasy bol,
Bir eldiń balasy emes – bar eldiń danasy bol!
Bir tonnyń jaǵasy emes – kóp qoldyń aǵasy bol!
Aqty aq dep baǵala, qarany qara dep qarala!
Ózegiń talsa, ózen boıyn jaǵala,
Basyńa is tússe, kópshilikti saǵala!
Ózińe-óziń kámil bol, halqyńa ádil bol!
Jaýyńa qatal bol, dosyńa adal bol!

*** *** *** ***

Ata aıtar bir tilek

Sóziń ataly bolsyn, atyń jotaly bolsyn!
Bıeń qulyndy bolsyn, túıeń botaly bolsyn!
Qoıyń egizden tapsyn, eshkiń segizden tapsyn!
Kelin aıaǵymen jaqsyn, qoıshy taıaǵymen jaqsyn!
Kóńiliń dýaly bolsyn, basyń syıly bolsyn!
Qyzyń ıbaly bolsyn, ulyń mıly bolsyn!
Kemimeı parqyń, qadirli halqyń basyńdy baǵalar bolsyn!
Óziń sary tisti qarıa, dáýletiń dárıa bolsyn!

*** *** *** ***

Áje aıtar bir tilek

Farabıdiń basyn bersin,
Jambyldyń jasyn bersin!
Jolbarystyń júregin bersin,
Jortqan eldiń bilegin bersin!
Júsiptiń dıdaryn bersin,
Muhammettiń ımanyn bersin!
Janyńa dalanyń keńdigin bersin,
Áziret Áliniń erligin bersin!
Ámireniń ánin bersin,
Sákenniń sánin bersin!
Qurmanǵazynyń kúıin bersin,
Sharanyń bıin bersin!
Qajymuqannyń qaıratyn bersin,
Isataıdyń aıbatyn bersin!
Abylaıdyń baıraǵyn bersin,
Baýyrjan batyrdyń aıbaryn bersin!

*** *** *** ***

Uıa salǵan bıik quzǵa óz jerim dep,
Ózimnen basqa eshkim barmasyn dep,
Shyńda jatyp shyńdalad ózdiginen,
Ákemdeı bolamyn dep bala búrkit.

Bul ózi kópten kútken armanyń ed,
Qýanyp jatyrsyń-aý ómirge ....... kep
Tilerim zor densaýlyq úsheýińe
Áli-aq erteń júresińder jetektep.

Bolsyn deımin dushpanyńnan dosyń basym,
Ár ýaqytta domalap órge tasyń.
Qosaǵyńmen qosa aǵar qyzyqtaı ber
Kórsetsin qyzyqtaryn er ........ 

*** *** *** ***

Barsha toıdyń basy eken shildehana,
Basy aınalyp baqyttan tur bosaǵa.
Ýildeıdi besikte jas sharana,
Shýylyna tirliktiń ún qosa ma?

Júrekterdi balqytyp qorǵasyndaı,
Sábı keldi ómirdiń jalǵasyndaı.
Keshirimdi ata-ana shalqaqtasa,
Shalqyp júrse shattyqtan jolǵa syımaı.

Janaryna anasy shashyp ushqyn,
Óbekteıdi sábıin asyǵyp tym.
Qýanyshtan ákesi shapqylap júr
Iisine mas bolyp jas-ıistiń.

Demer erteń qoltyqtan ulymyz kep,
Jatyr qazir júrekten jylý izdep.
Bala-tirek, baqytty bosaǵanyń,
Jarqyrasyn sónbeıtin kúnimiz bop.

Ne jetedi sábıdiń ińgásina,
Tolysady aqyly, tulǵasy da.
At ustaryń til kózden aman bolsyn,
Áli-aq órlep shyǵady shyń basyna!

*** *** *** ***

Sábıge esim qoıý

Tebirenip ana kókirek,
Ulasty toıǵa tolǵaǵy.
Emirenedi esi joq,
Sábıin qushyp qoldaǵy.

Ákeniń ósti mereıi,
Kóńilin kórdik shalqyǵan.
Iirgen altyn keneıi,
Qýantty túsip alshydan.

Ýildep aıtyp ińgásin
Aınalyp asyl armanǵa.
Ájesi kórip jalǵasyn,
Shashýyn shashty bar mańǵa.
Mańdaıyn ıiskep botasyn,
«Nemerem» deıdi ata da.
Erteń-aq sábı atasyn
Jetelep shyǵar jotaǵa.

Bolar ol erteń bir tulǵa,
Basy bop ómir kóshiniń.
Joralǵy kóp qoı ultymda,
Qoıaıyq sábı esimin.

*** *** *** ***

Besik toı

Bastalypty ómirdiń kóshi, mine,
Bóleıikshi bóbekti besigine.
Salt-dástúrin ultynyń bilip óssin,
Jigit bolsyn laıyqty esimine.

Ýildeıdi besikte shirkin, úmit,
Bola almaıdy besiktoı bul kún umyt.
Táliminen qazaqtyń ónege alyp,
Ádebi men óssinshi ǵurpyn uǵyp.

Kózin salsyn besikten bul ǵalamǵa,
Bıikter kóp qos qanat talmaǵanǵa.
Túzý óssin tal boıy, uıqy qanyp,
Sharshamasyn ǵalamdy sharlaǵanda.

Babasynyń besik bul teri sińgen,
Qazaq bolsyn besikke beli tıgen.
Aq besikti anasy terbetedi,
Bolyp óssin azamat eli súıgen.

Oń qolymen besikti terbet, kelin,
Áldımen sezdir ómir órnekterin.
Darıdy eken besikten qut-bereke,
Tileıin sanaly ulan er jetkenin.

*** *** *** ***