InfoHub Logo

Sońǵy kezderi muǵalimderdiń jalaqysyn kóbeıtý týraly jıi aıtylyp júr. Tipti parlamenttiń depýtattary da ustazdarǵa aı saıyn 350 myń teńgeden tólesek artyqtyq etpeıdi degen pikir bildirgen bolatyn.

Shymkent qalasyndaǵy polıtehnıkalyq kolejdiń ustazy Qaırat Omarov depýtattarǵa arnaǵan hatyn joldady. Ol  eki bettik hatta óz oıyn bildirgen dep jazady Zamana basylymy.

«Dúnıede myńdaǵan mamandyq túri bar. Sol mamandyqtar ishinde adamdy tárbıeleýmen qatar bilim nárimen sýsyndandyrý – eń jaýapty is bolyp sanalady. Barsha jumystyń ishinde qıyn da qurmettisi – urpaq tárbıesi. Jas urpaqtyń boıyna adamzattyń uly qasıetterin darytýdan artyq qyzmet bolmasa kerek. Ýaqyt óte kele elimizde jaǵdaı jaqsaryp, búginde bilim mekemelerindegiler óz jalaqysyn ýaqtyly alyp júr. Biraq sol eńbekaqylary tym az.

Muǵalim­derdiń árqaısysynyń jeke ýaıymdary bar. Bul – nesıe. Qazirgi muǵalimderdiń jalaqysy 60 – 70 myń teńge shamasynda.

Al elimizdegi fýtbolshylardyń jalaqysy óte joǵary. Jaǵdaılary da jasalǵan. Olardyń aldyna qoıǵan maqsaty – tek jeńimpaz bolý. Shet memleketterde stadıonnan ıne shanshar oryn taba almaısyń. Al bizde she? 5-6 myń ǵana jankúıerler bolmasa, stadıondarymyz bos, qańyrap turady. Ótken ǵasyrdyń 50-shi jyldary elimizde paıda bolǵan fýtbol osy ýaqytqa deıin sol deńgeıde qalyp keledi. Eń soraqysy, bul salaǵa mıllıardtaǵan qarjy ketip jatyr", - dep jazady ashynǵan avtor.

Jankúıer retinde elimizde sporttyń damyǵanyn qalaıtyn ustaz bul salaǵa tym kóp aqsha shashpaýdy usyndy.

"Elimizdegi «Aqtóbe» fýtbol klýby 2015-jyly shetten kelgen 4 legıoner oıynshysynyń árqaısysyna aı saıyn 60 myń AQSH dollaryn tólep otyrsa, «Shahter» komandasynyń jattyqtyrýshysy da óziniń eńbegin sondaı baǵaǵa laıyqty dep esepteıdi eken. Buǵan utys bolǵan jaǵdaıdaǵy úlken kólemdegi syıaqyny qossańyz, fýtbolshylardyń tabysynan basyńyz aınalary anyq.

Al Shymkenttiń «Ordabasy» komandasyna qazynadan bir jylǵa 3 mıllıard teńge bólingen. Endi salystyrmaly túrde qarasaq, 120 muǵalimi bar mektepke búdjetten 92 mıllıon teńge aýdarylady.

Demek, «Ordabasy» úshin bir jylǵa qarastyrylǵan qarjyǵa 33 mekteptiń muǵalimderin tolyq jalaqymen qamtamasyz etýge bolady.

Bıylǵy málimetke súıensek, «Aqtóbe» fýtbol klýby Alekseı Shetkınge aı saıyn 9 mıllıon teńge, Samat Smaqovqa bir aıda 6 mıllıon teńge jalaqy tólep otyrǵan.

Bul degenimiz – mekteptegi 120 muǵalimniń bir aılyq jalaqysy. Eger bul komandalar el chempıony atanyp, halyqaralyq jarystarda top jarsa oǵan esh ókinbes edik. Eshqandaı nátıje joq qoı. Chempıon bolý bylaı tursyn, alǵashqy úshtikke iline almaı júrgen komandalarǵa osynshama qarjy jumsaý kimge jáne ne úshin kerek?

Oılanyp qarańyzshy, muǵalim men dop tebýshiniń jalaqysyndaǵy aıyrmashylyq jer men kókteı emes pe? Búgingi jas urpaqtyń bolashaǵyna eleńdep, sol urpaqty durys joldan adas­tyrmaý úshin búkil ómirin osy qyzmetke arnaǵan ustazdyń mártebesi nege fýtbolshydan tómen bolýy kerek?, - degen kolej muǵalimi óz janaıqaıyna depýtattar qulaq túrse dep armandaıdy.

---