InfoHub Logo

Qazaqstanda Ulttyq biryńǵaı testileýdi tapsyrmaǵan túlekter birinshi mamandyǵyn tegin oqyp alady. Bul týraly búgin Úkimet otyrysynda Nátıjeli jumys jáne jappaı kásipkerlikti damytý baǵdarlamasyn tanystyrý barysynda Densaýlyq saqtaý jáne áleýmettik damý mınıstri Tamara Dúısenova málim etti.

«Jańa baǵdarlamanyń birinshi negizgi baǵyty jappaı oqytýdy uıymdastyrý bolyp tabylady.  Onyń aıasynda azamattarǵa birinshi jáne ekinshi mamandyqty aqysyz alýǵa múmkindik usynylady. 15-ten 24 jasqa deıingi jastar úshin birinshi jumysshy mamandyǵyn tehnıkalyq jáne kásibı oqytý bazasynda alýǵa múmkindik beriledi. Osy rette 21 myńǵa jýyq  UBT tapsyrmaǵan mektep túlekteri men oqý ornyna túspegen jastardy qamtý josparlanyp otyr»,-dedi mınıstr.

Onyń sózine qaraǵanda, oqý merzimi 2,5 jylǵa eskerilgen. Oqytýǵa jumsalatyn shyǵystarǵa bilim berý úrdisi, shákirtaqy men bir mezgildik tamaqtandyrý enip otyr. Sonymen qatar 25-ten 44 jasqa deıingi azamattar úshin ekinshi mamandyqty alý múmkindigi bar. Olar úshin kolejder, Ulttyq kásipkerler palatasynyń oqytý ortalyqtary bazasynda dýaldy bilim berýdiń qysqa merzimdi kýrstary uıymdastyrylady.

«Dýaldy bilim berý jumys ornynda jetekshisimen  birge júrgiziledi jáne oqytýdyń 40-50 paıyzyn quraıdy. Jetekshi retinde tek óndiristiń qyzmetkeri ǵana emes, sonymen qatar naqty kásippen aınalysatyn jeke kásipker de bola alady. Olar oqytqannan keıin, tálim alǵan adam osy kásipkerge jumysqa qalady nemese bul kásippen bólek aınalysýǵa múmkindigi bar»,-dep naqtylady T. Dúısenova.

Munymen qosa, shalǵaıdaǵy aýyldyq jerlerdegi turǵyndar úshin jergilikti jerlerde oqytýǵa arnalǵan mobıldi kásibı-tehnıkalyq oqý oryndary uıymdastyrylmaq. Jyl saıyn qysqa merzimdi kýrstarmen 26-56 myń adamdy qamtý kózdelip otyr.

---