InfoHub Logo

SHQO-da bastaýysh synyp muǵalimderine arnaıy granttar berilýi múmkin. Bul jóninde oblys ákimi Danıal Ahmetov «Nur Orda» mektep-lıseıiniń jumys barysymen tanysý kezinde aıtty, dep habarlaıdy Altaınús.

Zamanaýı qalypta jasalǵan bilim ordasynyń oqý kabınetterin aralap, oń baǵasyn bergen aımaq basshysy «Nur Oran» partıasy oblystyq fılıaly tóraǵasynyń birinshi orynbasary Ánýarbek Muhtarhanov pen oblystyq bilim basqarmasynyń basshysy Saırangúl Jumadilovaǵa IT-synyptardyń baǵdarlamasyn halyqaralyq talaptarǵa sáıkes ózgertýdi tapsyrdy.

Budan bólek oblys ákimi bastaýysh synyp muǵalimderine arnaıy grant bólý qajettigin atap ótti. Sondaı-aq, aımaq basshysy mektep oqýshylarynyń qaı salaǵa ıkemi baryn anyqtaý maqsatynda arnaıy test ázirleýdi júktedi.

«Bizdiń mektepterdegi IT-synyptarda barlyq jaǵdaı jasalǵan. Bul básekege qabiletti maman daıarlaýdyń birden-bir joly. Osyndaı mektepter óńirimizde kóp bolýy tıis. 11 synypty támamdaǵan túlektiń daıyn maman bolyp shyǵýyna jaǵdaı jasaý qajet. Shetelderde mundaı tájirıbe burynnan bar. Sondyqtan qazirgi ýaqytta bilimge degen kózqarasymyzdy ózgertýimiz kerek. Ol úshin bizde bar múmkindik bar. Eýropa men Azıanyń úzdik muǵalimderi oblystaǵy oqýshylardy İT-baǵdarlamalaýǵa oqytýy tıis, - dedi Danıal Ahmetov.

Sonymen qatar oblys ákimi memlekettik-jekemenshik seriktestik aıasynda Óskemendegi 44 mekteptiń ashanasy qaıta jańǵyrtylyp jatqanyn da tilge tıek etti. Jeke kásipkerler mektep ashanalaryna jóndeý jumystaryn júrgizip, jabdyqtar men jıhazdarmen qamtamasyz etip jatqanyn aıtqan ol jańa oqý jylynda eski jabdyqtarmen jumys istep turǵan 44 mekteptiń 35-ne qaıta jańǵyrtý jumystarynyń tolyq aıaqtalatynyn habarlady.

Al qalǵan 9 mekteptiń ashanasyn zamanaýı qalypqa keltirý jobasy boıynsha konkýrstar bıylǵy jyldyń qarasha aıynda jarıalanbaq.

---