InfoHub Logo

Qoja balasyn esekke mingizip, ózi jaıaý júrip, jolaýshylap kele jatady. Jolda kezdesken jurt:

— Bu jastardy qoısańshy. Ǵulama ǵalymdyǵymen jurtqa tanylǵan ákesin jaıaý júrgizip, ózi esekke minip alypty, — dep syn aıtady.

Sonda balasy Qojaǵa:

— Áke, til al, álginde aıtpadym ba? Qasaryspaı kel, esekke min, — deıdi.

Qoja esekke minip, balasy jaıaý júrip otyrady. Biraz júrgen soń taǵy da aldarynan qarsy jolyqqan adamdar:

— Áı-áı-áı! Eńgezerdeı bolyp esekke ózi minip keledi. Ana qurtaqandaı, ap-aryq balany jaıaý júrgizip, azapqa salý jón be eken? — deıdi. Muny esitken Qoja balasyn aldyna mingizip alady.

Birneshe qadam júrýi-aq muń eken, aldarynan taǵy da bir top esersoqtar kezdesedi. Olar bireýi aıtyp, bireýi qostap, Qoja men Qojanyń balasyn saıqymazaq etedi.

— Bu netken qanypezerler! Kip-kishkentaı esekke eki adam mingesip, uzaq jol júrýge bola ma eken? Qarańdar, qarańdar, osy, sirá, Qoja bolýǵa tıis.

Ábden yza bolǵan Qoja esekten ózi de túsip, balasyn da túsirip bos esekti aldyna sap, aıdap júrip ketedi.

Kóp uzamaı taǵy da birneshe kisi qarsy jolyǵady.

— Mundaı esýas jandar da bolady eken-aý, — deıdi olar, — esekti bos aıdap, ózderi osyndaı ystyqta sharshap-shaldyǵyp jaıaý kele jatyr.

Muny estigende, Qoja:

— Sirá, myna jurtqa jaǵyp bolmas, — depti.

---