InfoHub Logo

Aqsaq Temirdiń áskerinde bir top pil bolǵany, Ankara túbindegi aıqasta pilderdiń urysqa qatysqany jurtqa málim. Sol dáý janýardyń bireýin ol Qojanyń aýlyna kútýge jiberedi. Pil sharýalardyń kúlli egisiniń jegenin jep, jemegenin taptap, az kúnde-aq typ-tıpyl etedi. Sonsoń bir
kúni Qoja bastaǵan sharýalar Aqsaq Temirge aryz aıta barady. Biraq qaharly patshanyń aldyna barýdan jasqanyp, sharýalar bir-birlep sytylyp qala beredi. Qoja patsha saraıynyń aldyna kelse, qasyna ergen eshkim joq: «Qap, óńkeı sýjúrekter! — deıdi ishinen Qoja, — men aldanǵannyń ákesin senderge kórseteıin».

Aqsaq Temir Qojanyń ne sharýamen kelgenin suraıdy.

— Sen bizdiń aýylǵa ózińniń saraıyńda júretin bir pilińdi qonaqqa jibergen ediń, — dep bastaıdy sózin Qoja, — Aýyl adamdary ózińniń baǵynyshty paqyrlaryń, meni saǵan baryp, bizge degen yqylas raqymyń úshin alǵys aıtyp kel dep jiberdi. Biraq pil sorlynyń jat jerde jalǵyz júrgende ne muńdasar, ne syrlasar serigi joq, sorlynyń kúńirengende ashshy úninen adamnyń júregi jarylǵandaı. Aýyl adamdary menimen birge kelip edi, biraq seniń kózińe kórine almaı, syrtta menen qýanyshty habar estımiz dep kútip tur. Eger bizdi óz quzyryńa shyn berilip, bodam bolǵan jandar dep bilseń, bizdiń tilegimizdi aıaqqa qaldyrmassyń.

Mynandaı sózdi estigen soń, Aqsaq Temir qatty qýanady, Qojanyń ıyǵyna shapan japtyrtyp, zor syı-qurmet kórsetedi, aýyl adamdaryna aýyzsha sálem joldaıdy jáne Qojanyń aýlyna tabanda taǵy bir urǵashy pil jiberedi. Patsha aldyna qaýiptenip kelgen Qoja, zor syı qurmetke ıe bolǵanyna kóńili tasyp aýlyna qaıtady. Aýyl adamdary aldynan shyǵyp:

— Qandaı habar ákeldiń? — dep suraǵanda, Qoja bir keleli isti tyndyryp kelgen adamsha, tákappar pishinmen:

— Shúıinshi, bizge taǵy bir urǵashy pil jiberetin boldy, — depti.

---