InfoHub Logo

Ananyń uly áskerge ketken edi. Ol eki jyldyq áskerı merzimin óteýi kerek bolatyn. Odan hat úzbeı kelip turdy. Soldattyń uqyptap otyryp jazǵan hatynyń syrty da, ishi de anasyna baǵyttalatyn. Soldat óz hatynda anasyna ýaıymdaıtyn eshteńe de joq ekendigin, ásker jaıynda aıtylatyn áldebir alypqashpa sózderdiń beker ekenin, ondaı jaǵdaılar ózge bir áskerı bólimderde bolsa bolýy múmkin, al ózi qyzmet etip júrgen jerde jaǵdaı múlde basqasha ekendigin jazatyn. Múmkin ol muny anasy ýaıymdamasyn dep jazatyn shyǵar.

Birde ananyń ulynan hat keldi. Ádette soldattan hat kelgende, úı ishi alqa-qotan otyra qalyp, hat daýystap oqylatyn edi. Bul joly da solaı boldy. Konvert ashyldy. Hat qolǵa alyndy. Biraq bul jolǵy jaǵdaı múlde basqasha edi. Konverttiń ishinen soldattyń óz haty emes, áldebir aıbaq-saıbaq jazýy bar jarty paraq tanysý haty shyqty. Hat oqyǵaly otyrǵan úı ishindegiler áýelde ańyryp qaldy, sonan soń hattyń mazmunyn kórip dýyldasyp kúlip jiberdi:

- Al kerek bolsa! Sheshemizge áskerden tanysý hat ta kelip úlgerdi.

Biraq ana buǵan kúlgen joq. Ol konverttiń ishinen shyǵatyn óz ulynyń hatyn asyǵa kútip otyr edi. Endi onyń ishinen ulynyń haty emes, ózge bir qaǵaz shyqqannan keıin kóńili bir túrli qońyraıyp qaldy. Analardyń úmitimen oınaýǵa bolmaıdy ǵoı.

Sálden keıin úı ishi myna hatqa paıym jasaı bastady:

- Demek, ulyń konverttiń syrtyn aldyna ala toltyryp qoıǵan bolyp shyqty. Múmkin ol muny áskerde daǵdyǵa aınaldyryp alǵan shyǵar. Hat jazamyn da, syrty toltyrylyp daıyn turǵan konvertke salyp jiberemin dep oılaǵan ǵoı. Sol konvert janyndaǵy soldattyń qolyna túsedi. Ol burynǵy analardyń famılıa retinde óziniń jubaıynyń famılıasyn qabyldaıtyndyǵyn, sóıtip, óziniń ul-qyzdarymen famılıalas bolyp keletindigin eskermegen. Muny qaryndasy shyǵar dep oılaǵan. Osydan kelip ózinshe tanysý hat jazyp kórmek bolyp ázildegen túri ǵoı. Ulyń bul jóninde habarsyz. Múmkin ol joǵalǵan konvertke mán de bermegen shyǵar.

Ana aıtty:

- Bul jóninde balama habarlap jazyp júrmeńder. Osy úshin janyndaǵy balamen shekisip qalyp júrer. Maǵan bárinen de aldymen balamnyń amandyǵy qymbat.

Árıne, bul jóninde eshkim de jazǵan joq. Kóp uzamaı ananyń ulynyń óz haty keldi:

"Sálem berdik, apa".

Ananyń uly áskerden kelgennen keıin: "Áskerde tipti de qıyndyq bolmaıdy dep aıta almaımyn. Qıyndyq bolady. Biraq sol qıyndyq týraly hatqa jazýǵa bolmaıtyn edi. Olaı etsem, ony oqyp apam ýaıymdap qalady ǵoı. Jalpy, áskerge baramyn degen jigit qara jumyspen kóbirek shuǵyldanyp, sportpen aınalysyp barýy kerek. Sonda ǵana oǵan áskerdiń ómiri sál-pál jeńildeý tıýi múmkin" deıtin.

Birde ananyń ulymen áskerı qyzmetin birge ótep jatqan jerles jigittiń aǵasy inisine baryp qaıtpaq bolady. Ol anaǵa: "Sizdiń ulyńyz ben meniń inim áskerı qyzmetin bir jerde ótep jatyr ǵoı. Men inime baryp qaıtpaqpyn. Ulyńyzǵa berip jiberetin sálemdemelerińiz bolsa, ala keteıin", - deıdi.

Ana ana zatty bir ustaıdy, myna dámnen de berip jibergisi keledi. Qaltanyń túri kóbeıip bara jatyr. Osynyń bárin álgi jigit kórip otyr. Al áskerı bólimge barý úshin ózge respýblıkaǵa jol júrý kerek. Endi bir kezde ana óziniń shaı iship júrgen bir dorba nabatyn ala keldi. Naýat degenniń ózi de bir jep-jeńil dúnıe emes qoı. Sonda osynyń bárine qarap otyrǵan osy úıge naǵashyly-jıendi bolyp keletin álgi jigit:

- Apataı-aý, áskerge nabat arqalap barýdyń qajeti qansha? Ol jerde onsyz da nabat óndirilip jatqan jer emes pe? Tipti ulyń nabattyń ortasynda júrgen shyǵar? - deıdi áskerı bólim ornalasqan qalanyń ataýy Lenınabad qalasy dep atalatyndyǵyn meńzeı sóılep.

Ananyń bul sózge ishek-silesi qatyp kúledi:

- Bar bolǵyrlar, qaljyńdaryń qalmaıdy-aý. Alyp ket nabatty da ulyma! Janyndaǵy joldastarymen bólisip jesin.

Analar tipti de ýaıymshyl keledi.

---