InfoHub Logo

Mamyr aıynyń mamyrajaı kúniniń biri bolsa kerek. Aýyl janyndaǵy Kóktóbeniń basyna shyǵyp, biri áńgime aıtyp, ekinshi toby toǵyzqumalaq oınap otyrǵan jigitter alystan jortyp kele jatqan eki attyǵa kózi túsedi.

Jol jańaǵy tóbeni aınalyp ótedi. Ekeýiniń biri — qara-murtty jigit, qasyndaǵy serigi — úkilep taqıa kıgen qyz bala. Ekeýiniń aty da jorǵa, tóktirip keledi. Olar jaqyndaǵan saıyn ekeýiniń túr-túsine, kıim kıisine, jarasymdy júris-turysyna, mingen atyna tańdanyp, aýyl azamattary ańyrap turyp qalady. Qaramurtty jigit oń qolyn keýdesine aparyp, sálem bere ótedi.

Sonda jigitterdiń biri:

— Túý, myna jigittiń atynyń jorǵasyn-aı, qyzdan alǵan joldasyn-aı! — dedi.

Sol kezde qyz atynyń basyn tartyp turyp:

— Eı, jigit! Bilip sóıle, sen jigit. Bul jigittiń sheshesi meniń sheshemniń qaıyn enesi, men bul jigittiń jan denesi, sonda boldym nemenesi? — deıdi de, «shý, janýar» dep atyn tóktirip ala jóneledi.

Sonda aýyl jigitteri sóz mánisin birden túsinbeı, «shynynda da nemenesi boldy» dep bir-birine qaraǵan eken. Kópti kórgen aýyl aqsaqaldarynyń biri:

— Nemenesi bolýshy edi? Jigittiń jan denesi — qyzy boldy emes pe? — degen eken.

---