InfoHub Logo

Qypshaqtyń Kóldeneń ulynan taraǵan Qaraqyz rýy Jarmaǵanbet qajynyń Saqı degen balasy Qoıshybaımen qurdas bolsa kerek. Ákesiniń jolyn qýyp Saqı da Túrkistanǵa baryp qaıtýdy ádet etken. Birde Saqı qajydan keldi, qolyn alaıyn, amandasaıyn dep Qoıshybaı kele qalady. Shamasy birer júzdi qaǵyp alsa kerek.

— Assalaýmaǵaleıkým, — dep qolyn alýǵa jaqyndaǵanda, Saqı:

— Áı, Qoıshybaı, sen dinnen shyqtyń ǵoı, mas adamǵa sálem berýge de, alýǵa da bolmaıdy. Mine, myna jylandy, — dep kórsetedi qolyndaǵy kitaptan, — Aıa Sofıany on metr bıiktikke otyrǵan jerinen shaqqanda denesiniń úshten eki bólimi jerde jatyr. Erteń ólgende seni dál osy jylan shaǵatyn bolady, — deıdi.

— Endi qaıteıin! Myna jylannyń túri jaman eken, — dep shyǵyp ketken Qoıshybaı irkilmesten Másálim degen moldaǵa baryp, munyn shaǵady:

— İstegenim de kóp, kinám da kóp, siz moldasyz ǵoı, sharıǵatty kóp bilesiz, bir jeńildik bere almas pa ekensiz? Saqı maǵan bir keremet jylan kórsetti ǵoı, sol jylan meni ólgende shaǵatyn boldy. Endi qaıtemin, qandaı qaıla tabamyn, — dep kózinen jasy aǵyp balasha jylaıdy.

— Bir Allanyń ózine syıyn, keńshiligi kóp Allaǵa jalbarynsań, namaz oqysań, taraýyqtan qalmasań, kúnáńdi kesher — dep, aqyl beredi Másekeń.

Bir kúni qarttar jınalyp otyrǵan jerde Qoıshybaı:

— Áı, Saqı, men seniń keremet jylanyńa bir ádis taptym, túbi sodan durysy bolmas, — dep qoıady.

— Iá, ol qalaı? Ol ne? — desti qarttar.

— Bizdiń úıde bir úlken temir sandyq bar, adal eńbegimmen taptym, men ólgesin, sol sandyqqa salyńdar, aýzyn jaqsy- lap qulyptańdar. Sonda jylan meni shaǵa almaıdy, — deıdi Qoıshybaı.

---