InfoHub Logo

OQO Túlkibas aýdany Turar Rysqulov eldi-mekenindegi agrobıznes jáne saıahat kolejiniń stýdentterden synaq úshin 2000 teńge talap etken muǵalimi «Azattyqqa» suhbat berdi dep habarlaıdy «Qamshy» portaly.

Kolejde «Tiginshi» mamandyǵy boıynsha oqyp jatqan 2-kýrs stýdentteri «Azattyq» tilshisine oqý ornyndaǵy paraqorlyqtyń órship turǵanyn aıtyp shaǵymdanǵan. Ashynǵan stýdentter 18 pánniń jeteýinen ǵana parasyz synaq tapsyrdyq deıdi. Al, kolej bul 2015-2016 oqý jylyndaǵy birinshi para alý oqıǵasy dep aqtalýda.

«Muǵalimderdiń para suraıtynyn aıtýdan qorqamyz. Óıtkeni tekserý kelse, oqýshylardy [para týraly aıtpaýǵa] daıyndap qoıady. Olar (tekserýshiler – red.) ketedi, biz – qalamyz. Sosyn qorqamyz», - degen «Azattyq» tilshisine attaryn atamaýdy ótingen stýdentter.

Stýdentter ondaı-aq, 2-kýrsta «4» degen baǵanyń «baǵasy» qolma-qol tólese 1000 teńgege, qaryzǵa qoıdyrsa 1500 teńgege óskenin aıtqan. Al, «5» degen baǵa alý úshin 2000 teńge berýiń kerek eken.

Áleýmettik jelilerde 11 aqpan kúni jarıalanǵan vıdeony stýdentter qańtar aıynyń ortasynda túsirgen kórinedi. Stýdentterdiń aıtýynsha muǵalimniń aqsha talap etkeni vıdeoǵa túsirilgeni matematıka pániniń muǵalimi Nurjamal Janbosynovaǵa eskertilgen de eken.

«Tobymyzda turmysqa shyqqan qyz bar. Qazir aıaǵy aýyr. Bir pánnen "jeńildik" dep baǵasyn 500 teńgege qoıyp berdi. Sonda turmysqa shyqpasaq, bizge jeńildik jasalmaı ma?», - dep zar qaǵady shaǵymdanýshy stýdentter.

Qazir oqý ornynda oblystyq bilim basqarmasynyń bas mamany Álibek Kenjebaev jumys istep jatqanyn aıtady «Azattyq».

"Eshbir sesıada aqsha jınalmaý kerek. Eshqaısyńa tıispeıdi. Eshkimniń tıisýge quqyǵy joq. Jaǵdaıǵa baılanysty tekserý bitken soń shara qoldanamyz. Kolej dırektory, onyń orynbasarlarynyń jumysta qalýy ekitalaı. Bólim meńgerýshileri men muǵalimge de shara kóremiz", - deıdi Álibek Kenjebaev.

Al oblystyq bilim basqarmasynyń qyzmetkeri Baıanǵalı Jumabaevtyń Azattyqqa aıtýynsha, mundaı jaǵdaıda sybaılas jemqorlyq týraly zań men eńbek kodeksindegi tártipterdi, ózine mindettelgen júktemelerdi durys atqarmaǵany úshin shara qoldanylady. Aqpannyń 12-si kúni keshkisin bilim basqarmasy jaýapty adamdarǵa qoldanylǵan tártiptik sharalar týraly málimet taratty. Oqytýshy Nurjamal Janbosynova «Eńbek kodeksiniń» 52-baby 1-tarmaǵy, 14-tarmaqshasyna (Tárbıeleý fýnksıalaryn atqaratyn jumysker osy jumysyn jalǵastyrýmen syıyspaıtyn, moralǵa qaıshy qylyqtar jasaý) sáıkes jumystan bosatylǵan. Kolejdiń kásiptik oqytý bóliminiń meńgerýshisi Janar Qılybaeva «Eńbek Kodeksiniń» 52-baby 1-tarmaǵy, 16-tarmaqshasyna (Tártiptik jazasy bar jumysker eńbek mindetterin dáleldi sebepsiz qaıtalap oryndamaý) sáıkes qyzmetinen alynǵan. Basqarma málimdemesinde «Túlkibas agrobıznes jáne saıahat koleji dırektorynyń mindetin atqarýshy B.Daýletovke jáne kolej dırektory S.Myńbaıǵa 2016 jyldyń 15 aqpanynda tártiptik shara kórý máselesi qaralyp jatqany» jazylǵan.

«Azattyq» tilshisimen sóılesken 51 jastaǵy Túlkibas agrobıznes jáne saıahat kolejindegi matematıka pániniń burynǵy oqytýshysy Nurjamal Janbosynova aqpannyń 11-i kúni óziniń stýdentterden para talap etý týraly YouTube jelisinde vıdeo jarıalanǵanyn kórgen soń «densaýlyǵy nasharlaǵanyn» aıtty. 27 jyldyq jumys ótili bar oqytýshy "Azattyqqa" aqpannyń 11-i kúni jumystan shyǵarylǵanyn rastady.

"27 jyl jumys istegen bolsam, birde bir sógis almaǵam, eskertýim de joq. Stýdentterge «synaq tapsyryńdar» dedim. Synaqtan ótken qyzdar baǵasyn alyp ketti. İshinde jaqsy oqyp, avtomat alatyndar bar. Bul tórt qyz (vıdeo túsirgen stýdentterdi aıtady – red.) jyl boıy sabaqqa keshigip keldi. Sabaqta uıyqtap otyrdy. Dápterleri de joq boldy. Men óz sózime jaýap bere alamyn", - dedi Nurjamal Janbosynova.

---