InfoHub Logo

Raıymbek aýdandyq sport kesheni dırektory orynbasary Janam Kerimbaevpen suhbat.

— Qaıyrly kún, Janat myrza! Kóńilderge erekshe shattyq syılaıtyn kóktem mezgiliniń búgingideı jaıma-shýaq kúninde ózińizdeı azamatpen suhbattasý sáti buıyrǵan eken. Kóktemdik kóńil-kúıińiz qalaı? 

— Rahmet, barlyǵy oıdaǵydaı, taǵy bir jańa jumys aptasyn bastap, kúndelikti birqalypty tirshilikke kirisip kettik!

— Jalpy qalyń jurtshylyq ózińizdi aýdandyq sportqa úlken úles qosyp, talaı jeńimpazdardyń qanatyn qataıtqan azamat retinde tanıdy. Ózińizdiń sportqa qyzyǵýshylyǵyńyz qashannan bastap oıandy jáne oǵan yqpal etken adamdar bar ma?

— Sportpen bala kezden aınalystym deýge bolady. Sport mektebi bizdiń úıdiń qasynda ornalasty. 12 jasymda qyzyǵýshylyq jetelep,  sport mektebine baryp, kúrespen aınalystym. Alaıda, ol shaqta jattyqtyrýshy bolýdy armandamaǵan edim. Keıinnen, áskerden oralǵan soń, kezinde jattyqtyrýshym bolǵan, sport mektebiniń sol shaqtaǵy dırektory bolǵan Birbaev Bekbolat aǵamyzdan usynys túsip, jattyqtyrýshy bolyp eńbek jolyn bastadym. Árıne, basynda shamaly kúmándanǵanym ras, degenmen, Bekbolat aǵamyzdyń qoldaýymen nyq qadam jasap, iske kiristim. Bar kúmánim seıilip, bul jumysqa degen qushtarlyǵym artty. Aldyma kelgen shákirtter de meniń erekshe yqylasymdy oıatty. Jattyqtyrýshylyqpen qatar, jarystardy da nazardan tys qaldyrmadym. “Chempıonat Qazaqstandy” utyp aldym, sol shaqta shákirtterim de túrli jarystarda júldeli bolyp júrdi. 

— Siz tárbıelegen shákirtterdiń birazy, búginde  el maqtar azamattar bolǵanyn bilemiz. Shákirt tárbıeleýde qandaı qasıetterdi basshylyqqa alasyz?

— Árıne, men tárbıelegen shákirtterdiń barlyǵy chempıon bolyp ketpeıtini anyq. Tipten, aldyma kelgen júz shákirttiń bir-ekeýi ǵana “sport sheberi” atanyp nemese odan  úlken jetistikke jetýi múmkin. Sol sebepten, eń bastysy, kelgen shákirttiń densaýlyǵyn túzep, belgili bir jaqsy ortaǵa beıim adam bolyp qalyptasýy. Meıli, ol sport salasynan ózge salada bolsyn, bastysy- aınymas tulǵalyq qasıetiniń bolýy. Men maqtanyshpen aıta alatyn taǵy bir dúnıe, men tárbıelegen shákirtterdiń sporttan ózge túrli salalardyń kóshbasshylary bola alǵandyǵy. 

— Aýdanymyzdyń atyn aýdan, oblys, respýblıka kóleminde asqaqtatyp júrgen qandaı shákirtterińizdi erekshe maqtan tutar edińiz?

— Álemdik dárejede júlde alyp, tanymal bolǵan shákirtterim ázirge joq. Alaıda, Respýblıka kóleminde júldelerge ıe bolyp qýantqan sportshylar joq emes, ózim erekshe maqtan tutyp atyn atar bolsam, Nurǵazıeva Gúlbaqyt 5 dúrkin “Qazaqstan chempıony” boldy, Jasóspirimder arasyndaǵy Azıa chempıonatynda 2 ret júldeger atandy, odan ózge Qyrǵyzbaı Aıdana, Júnis Aızada syndy arýlardy da erekshe maqtanyshpen aıta alamyn. 

— Uzyn qulaqtan estýimiz boıynsha, eńbegińizdi erekshe elegen shákirtterińiz sý jańa avtokólikti syıǵa tartqan eken. Syı-jeńgendiki, sóz tergendiki demekshi, bul da eńbegińizdiń kezekti bir erekshe baǵalanýy dep bilemin.

— Iá, jaqynda 50 jasqa tolǵan týǵan kúnime shákirtterimniń syılyǵy avtokólik pen meniń ómirim men qyzmet jolym týraly jasaǵan vıdeorolıkteri boldy. Degenmen, olardy tárbıeleýdegi maqsatym, kólik alý bolmaǵan edi. Bul syılyqty tartý etýshiler meniń tálim uıamnan  birneshe jyl buryn qanat qaqqan azamattar edi. Sonda da ýaqyt araqashyqtyǵyna qaramastan, tálimgerlerin umytpaı osyndaı syı jasap jatqandaryna úlken alǵys. Erekshe rızamyn.

— Bárimizge aıan, bıyl tuǵyrly Táýelsizdigimizge -30 jyl. Siz de táýelsizdiktiń jón aıtar kýágerleriniń birisiz. Táýelsizdik jyldary elimizdiń, aýdanymyzdyń sport tynysynda qandaı jańalyqtar men ózgerister boldy?

— Meniń jas ereksheligimdi eskersek, Táýelsizdikke deıingi jáne keıingi zaman kelbetin kórdim deýge bolady. Al eńbek jolymdy týra Táýelsizdik alǵan jyldary bastadym. Ótken jyldardyń kórinisi áli kóz aldymda. Alǵash jumysqa turǵan jyldary jalaqyny alýdyń ózi asa qıynǵa soqty, eldegi birqatar jumys oryndary osyndaı sıpatta boldy. Tek sol kezdegi syrttaı oqýdaǵy sesıany syltaýratyp, aqsha surap ótinim jazǵan kezderimiz de boldy. Al qazirgi ýaqytta, bizdiń salanyń jalaqysy ózge salalardan tómen bolǵanymen, ýaqytyly alý qadaǵalanady. Sonymen qatar, alǵashqyda sport zaldar qurylysyn ózimiz turǵyzsaq, búginde sport mektepteriniń qurylystary memleket tarapynan qoldaýǵa ıe. Táýelsizdiktiń alǵashqy jyldary men búgingi kúndi salystyrsaq, úlken ózgeristerge kóz jetkizemiz. Aýdanymyz bólingeli jaǵdaı tipten jaqsardy. 

— Aýdanymyz bólingeli jaǵdaı jaqsardy deısiz, jalpy aýdanymyzdaǵy qazirgi kúres salasynyń ahýaly qandaı? Basshylyq tarapynan tıisti nazar aýdarýlar júzege asýda ma?

— Bizdiń aýdandyq sport mektebinde birneshe kúres túrleri bar. Olar: grek-rım kúresi, qazaq kúresi, erkin kúres, dzúdo kúresi. Bul kúres túrleriniń ishinde, erkin kúres aýdanymyzda burynnan ilgeri damý ústinde, qalǵan kúres túrleri de ýaqyt aǵymymen, jaqsy nátıjeler kórsetilýde. Al aýdan tarapynan kóńil bólýge keler bolsaq, biz bıylǵy jylǵa deıin aýdan búdjetine qarasty bolyp keldik, sol ýaqytta tıisti qarajat mezilimen aýdarylyp, kóńil bólinip keldi. Al osy jyldan bastap, biz oblystyq basqarmaǵa qarastymyz. Tıisti qarjyny berip, jaǵdaıdy jasaýdy. Búgingi úkimet jaǵdaı ilgeridegi ýaqyttarǵa qaraǵanda edáýir jaqsardy. Kóp másele qarjyǵa kelip taqalatyn myna zamanda úkimet tıisinshe óz mindetin oryndaýda.

— Suhbatyńyzǵa úlken alǵys! Qyzmetińiz óz jemisin berip, shákirtterińiz úmitińizdi aqtaı bersin! Eńbegińizdiń nátıjesin álemdik deńgeıde kórseter shákirtterińiz kóp bolsyn!

Suhbattasqan Aqerke Bıjan

---