InfoHub Logo

Bilim berý salasy: Qatynas, shyǵarmashylyq
Bilim kózi: til damytý, qurastyrý

Taqyryby: Táýelsizdik tiregi
Maqsaty: Balalarǵa Táýelsiz sóziniń maǵynasyn, táýelsizdiktiń qandaı eńbekpen, kimder arqyly jetkendigin túsindirý, elimizdiń Prezıdentin, rámizderimizdi tanystyrý, olardy qurmetteýge tárbıeleý, qurastyrý arqyly oılaý qabiletterin arttyrý.
Kerekti quraldar: Elbasy jáne rámizderimizdiń, Qazaqstan Respýblıkasynyń sýreti,
Ádis - tásili: túsindirý, suraq – jaýap, qurastyrý.
Yntalandyrý sezimdi oıatý: ánuran
- Balalar, biz qaı memlekette turamyz?
- Durys, biz táýelsiz Qazaqstan Respýblıkasy memleketinde turamyz?
- Táýelsiz degendi qalaı túsinesińder?
- Táýelsiz - eshkimge baǵynyshty emes, azat, erkin degen maǵynany bildiredi, ıaǵnı biz jeke ózimizdi - ózimiz basqaratyn memleketpiz.
Qazaqstan Respýblıkasy 1991 jyly 16 jeltoqsanda táýelsiz memleket atandy. Balalar, bul táýelsizdik bizge ońaı kelgen joq. Qaırat Rysqulbekov, Lázzat Asanova, Erbol Sypataev sıaqty aǵa - tátelerimizdiń erliginiń, namysynyń arqasynda jeke, derbes memleket bolýǵa qol jetkizdik. Ol kisilerdiń eńbegin asa qurmetpen baǵalaýymyz kerekpiz.
Elimiz táýelsiz bolǵannan soń onyń elbasy ıaǵnı, prezıdenti, ánurany, týy, eltańbasy bolady.
Ánuranynyń sózin bárimiz bilemiz. al ony jazǵan avtorlary: Jumeken Nájimedenov, elbasymyz - Nursultan Nazarbaev, ánin jazǵan ataqty qazaqtyń kompozıtory – Shámshi Qaldaıaqov.
Týymyzdyń túsi kók, onda kún, qyran búrkit jáne ulttyq oıýymyz oryn alǵan. Kók aspanymyzda, kúnimiz jarqyn, qyran qustaı qanatymyz talmaı sharyqtaıtyn ultjandy memleketpiz degendi bildiredi eken.
Týdyń avtory - Sháken Nıazbekov
Eltańbamyzdy ortasynda shańyraq, Qazaqstan ortaq úıimiz, bes juldyz – bes qurlyqqa birdeı qushaǵymyzdy ashyp qarsy alamyz, al qanatty pyraq, ańyzdardaǵy myqty janýardy meńzeıdi, al ýyqtar – bizdiń birligimizdi kórsetedi eken.
Eltańbanyń avtorlary - Jandarbek Málibekov, Shota Ýálıhanov.
Suraq arqyly túsinikterin tolyqtyrý.
- Qane, balalar Otan, týǵan jer, rámizder týraly taqpaq bilemiz be?
Artem:
Álemge aty belgili,
Qazaqstan elimdi.
Ulyqtaıdy urpaǵy,
Bolashaǵyna senimdi.
Erasyl:
Kók aına kólim bar,
Keń jaılaý jerim bar.
Eńbegi elengen,
Ataqty erim bar.
Abylaı:
Otanymnyń tórinde,
Saryarqanyń órinde.
Tý ustaǵan Astanam,
Ásem qalam - bas qalam.
Nuraı:
Táýelsizdik – sábıimniń kúlkisi,
Táýelsizdik aq batasy atamnyń.
Amır:
Tarıh bop keshegim,
Kóp jumbaq sheshemin.
Egemen elime,
Ege bop ósemin.
Gúljan:
Baqytty bop júrgenim
Seniń arqań Qazaqstan.
Elim meniń tiregim,
Qushaǵynda gúl atam.
Oleg:
Jemisti baýym bar,
Shyń - quzdy taýym bar.
Eńisti ór etken,
Jeńisti qaýym bar.
Arman:
Kók baıraǵy babamnyń,
Búgingi urpaq alaýy,
Tiregi áke balanyń,
Qazaqstan jalaýy.
Arlan:
Bıik bolsyn shoqtyǵyń,
Atyńdy aıtam án qylyp,
Jelbireıdi kók týym,
Tóbemizde máńgilik.
Qalamqas:
Eltańbasy elimniń,
Eldigimniń belgisi.
Munda da bar erligim,
Munda da bar jer kúshi.
Baıan:
Meniń elim – jalǵyz el,
Meıirimmen shýaqty.
Meniń elim álemde,
Birligimen qýatty.
Aıbek:
Jaıdarly jerim bar,
Óristi belim bar,
Erlikke baýlıtyn,
Egemen elim bar.
Sergitý sáti:
Kel balalar, turaıyq,
Úlken sheńber quraıyq,
Shańyraqty kóterip,
Keregeni quraıyq,
Ýyqtarsha ıilip,
Shańyraqqa qosylyp,
Kıiz úıdi quraıyq.
Kútpegen sát:
Esik qaǵylyp, ishke Otan súıgish azamat kiredi:
- Balalar, men óz elimdi, Qazaqstan Respýblıkasyn, ıaǵnı Otanymdy súıemin, qurmetteımin. Jolda kele jatsam, aldymda eltańba synyqtary shashylyp jatyr, onyń synǵan kúıi shashylyp jatýyna bolmaıdy, sol sebepten bárimiz birge qurap, eltańbanyń tolyq músinin shyǵaryp, tórimizge ilip qoıaıyq.
Qandaı Otan, týǵan jer týraly maqal bilesińder:
Aıbek:
Otan – ottan da ystyq.
Gúljan:
Otan - otbasynan bastalady.
Mahabbat:
Otan - ortaq úı.
Arlan:
Týǵan jerdiń túni de ystyq,
Kúni de ystyq.
Artem:
Týǵan eliń - tuǵyryń.
Arman:
Týǵan jer - altyn besik
Kútiletin nátıje:
Bilýi kerek: 16 - jeltoqsan Táýelsizdik kúniniń mańyzyn.
Úırenýi kerek: Rámizderdi qurmetteýge.

Almaty oblysy, Kerbulaq aýdany,
Qoǵaly aýyly, "Qarlyǵash" balalar baqshasynyń tárbıeshisi
Ibraımova Gýlchat Kabyljanovna