InfoHub Logo

Golovkın Gennadıı  — qazaqstandyq kásipqoı boksshy, orta salmaqta óner kórsetedi. Orta salmaqtaǵy álem chempıony (IBO tujyrymy, 2010 - q.ý; WBA tujyrymy, 2011 - q.ý; ýaqytsha WBC, 2014 - q.ý IBF tujyrymy, 2015-q.ý). The Ring jýrnalyna sáıkes P4P salmaq dárejesine qaramastan úzdik boksshylardyń úshtigine kiredi. 2013 jyldyń sońynda WBA tujyrymy boıynsha, orta salmaq dárejesindegi qazaqstandyq sýperchempıon Gennadıı Golovkın bedeldi amerıkandyq USA Today basylymynyń nusqasy boıynsha, «Jyl boksshysy» atanǵan bolatyn.

Qazirgi ýaqytta, qazaq eliniń birtýar, qaıtalanbas tulǵasy, belgili sportshy Gennadıı Golovkındi bilmeıtin jan kemde-kem shyǵar. Kezinde áýesqoı boksta Qazaqstan namysyn álem jáne olımpıada oıyndarynda abyroıly qorǵaı bilgen boksshy- qazirgi tańda elimizdiń atyn kásipqoı deńgeıde búkil álemge tanytyp júr desek, artyq aıtqandyq emes. Kásipqoı boksta 34 kezdesý ótkizip, bárinde jeńis týyn tikken GGG-ataqty Maık Taısonnyń nokaýt jóninen rekordtyq kórsetkishin jańalady. Bul degenińiz, sońǵy 21 kezdesýdiń barlyǵyn nokaýtpen aıaqtady degen sóz. Al, sonaý 1992 jyly Islam dinin qabyldaǵan Maık Taısonda bul kórsetkish- tek 18 nokaýt qana. Amerıkalyqtyń asa aýyr salmaqta óner kórsetkenin eskersek, bul jetistiktiń teńdessiz ekenine kózińiz jete túsedi. Sebebi, aýyr salmaqtaǵy boksshylar, orta salmaqqa qaraǵanda, salmaǵyna baılanysty jıi nokaýtqa ushyraıdy. 

Dese de, sońǵy ýaqyttary bizdiń boksshyǵa laıyqty qarsylas tabý qıynnyń qıynyna aınalyp júr. Negizinde, kásipqoı boksta barshanyń kóz tigetin 4 negizgi  beldik bar. Bular  tanymal  -WBA(World Boxing Association) , WBC(World Boxing Council), WBO(World Boxing Organization ) jáne IBF(International Boxing Federation) uıymdarynyń beldikteri. Osy tórteýin biriktirgen boksshylar- neken saıaq. Qazaqstandyq chempıonnyń naǵyz tanymal tolyqqandy chempıonǵa aınalýy úshin, atalmysh beldikterdi baǵyndyrýyn zaman talap etip otyr. Bizdiń oıymyzsha, Golovkınniń alǵa qoıǵan maqsaty - osyǵan kep saıady. Qazirgi kezde, Gena - WBA men IBF tujyrymdary boıynsha negizgi chempıon. Demek, joldyń jartysy júrilip ótti degen sóz. Qalǵan 2 beldikti ıelený qıyn emesteı kóringen. Alaıda, qyzyqtyń bári osy jerden bastalady. WBO tujyrymy boıynsha, chempıondyq ataqty ıelený múmkindigi 2-3 aı buryn berilgendeı bolatyn. Osy tujyrym boıynsha, burynǵy chempıon Endı Lı Genamen kezdesýge erekshe qulshynys tanytqan edi.  Degenmen , munyń aldynda ırlandyq boksshy óz otandasy Bıllı Djo Sonderspen judyryqtasyp, kútpegen jerden jeńilis tapty. Kóptegen boks mamandarynyń pikirinshe, eger osy kezdesýde Endı Lı jeńgende, Gennadıı Golovkınmen qolǵap túıistirýi sheshilgen másele bolatyn. Endigi kezek, sý jańa chempıon Djo Sonderspen kelissóz júrgizý úshin Gena men onyń komandasy arnaıy Anglıaǵa at basyn burdy. Qazaq chempıonynyń tanymaldylyǵyn Vest Hem qalasyndaǵy stadıonda ótken fýtbol machynda aǵylshyn jankúıerleriniń qalaı qarsy alǵanynan baıqaýǵa bolady. Ókinishke oraı, kelissózder nátıjesiz boldy. Sheteldik baspasózdiń málimetine súıensek , Sonders úlken somada aqsha talap etken kórinedi. Atap aıtqanda, baqandaı 6 mln dollar. Tipti, Golovkınniń komandasy usynǵan 4 mln-di mise tutpapty. Qysqasha aıtqanda, ırlandtyq boksshy qazaqtyń joıqyn kúshine tótep bere almasyn bilip, kezdesýden úzildi kesildi bas tartty. Kelesi kezekte , WBC tujyrymy boıynsha tolyqqandy chempıondyq ataqty ıelený turdy. Eske sala keteıik, bul tujyrym boıynsha, GGG ýaqytsha chempıondyq ataqty uzaq ýaqyt boıy ózinde saqtap kele jatyr. Absolúttik chempıon bolý úshin, meksıkalyq Saýl Alvarespen judyryqtasý nıetin Gennadıı eshqashan jasyrǵan emes. Tipti, bul úshin Alvarestiń namysyn jyrtyp júrgen Golden Boy kompanıasymen kelisimge kelgendeı boldy. Atap aıtqanda, Alvares pen Golovkın ózara kezdesýdiń aldynda erikti túrde bir-bir kezdesýden ótkizýi tıis edi. Ataqty Oskar de la Hoııanyń ózi  qyrkúıek aıynda Saýl tóbeleske tolyq daıyn bolady dep sendirdi. Degenmen, bul ýádeniń iske asatynyna senim az. Sebebi, qazirgi kásipqoı boksta aqsha men saıasat alǵashqy orynǵa shyǵyp ketti degen pikirler jıi aıtylyp júr. Munymen tolyqtaı kelisýge bolady. 

Shyndyǵynda, qazirgi tańda, Golovkınmen judyryqtasýǵa júregi daýlaıtyn erler kemde-kem. Joıqyn soqqylar astyna túsip qalýǵa qorqatyn batyr-symaqtar , kezdesýdi barynsha keıinge shegerý úshin, ártúrli qıturqy syltaýlarmen qashyp qutylýda. Golovkınniń jasy 34 - te ekenin eskersek, jyl ótken saıyn belsendiliktiń azaıyp, jas kelgen saıyn kúsh-qýattyń sarqylatyny jasyryn emes. Sondyqtan, ýaqytty barynsha tıimdi paıdalanyp, uly chempıondar qataryna qosylý úshin Golovkınge 3 joldyń birin tańdaýyna týra keledi.

1 jol.  
1 orta salmaqqa túsip, ataqty Floıd Meıvezermen shaıqasý. Meıvezer - amerıkalyq boksshy, tabysy jóninen álemniń nómiri birinshi sportshysy. Bul boksshymen judyryqtasý - ár boksshynyń armany. Golovkın birneshe ret tek Meıvezermen kezdesý úshin, bir salmaq tómen túsetinin jarıalaǵan bolatyn. Sondyqtan, barlyǵyna qol siltep, Floıd Meıvezermen kelisimge kelýdiń jolyn izdeý kerek. Az kún buryn, amerıkalyqtyń asa úlken gonorar úshin  boksqa qaıta oralýy múmkin ekendigin jetkizgenin eskersek, temirdi qyzǵan kezde soǵýdyń reti kelgen sıaqty.

2 jol.
Sýperorta salmaqqa kóterilip, básekege túsý. Golovkındi synǵa alýshylardyń negizgi bóligi-onyń osy ýaqytqa deıin naǵyz myqty qarsylaspen jolyqpaǵanyn aıtady.Eger , bir salmaq joǵary kóterilse, “sen tur men ataıyn“ deıtin erler jetip artylady. Bulardyń keıbireýleri-aǵylshyn Dıgeıl men Karl Froch, nemis Artýr Abraham, meksıkalyq Chaves, polshalyq Fanfara jáne t.b  Naǵyz ataq pen tanymaldylyqtyń tek myqtylarmen judyryqtasý arqyly keletini belgili. Sondyqtan, kózdi jumyp, joǵary qaraı salmaǵyn aýyrlatýy bek múmkin. Naǵyz chempıondyq ataqqa qol jetkizý úshin, Amerıka atty qurlyqtyń turǵyndaryn moıyndatý kerek.

3 jol.
Komandasyn aýystyrý. Jasyratyny joq, Golovkınniń promoýteri Tom Lefler jaman menejer emes. Bylaısha aıtqanda, ortaqol. Al, naǵyz chempıonǵa el Heımon, Bob Arým sıaqty abyroıly promoýter qajet. Osy ýaqytqa deıin, naǵyz chempıondyq kezdesý uıymdastyrý qıynnan qıystyratyn maman úshin aýyr is emes.

Qazirgi tańda, Gennadıı Golovkın balshyqqa batyp, shyǵa almaı turǵan sáıgúlikti elestetedi. Jaqynda 23 sáýirge belgilengen amerıkalyq Domınık Ýeıdpen kezdesýi osynyń aıqyn dáleli. Ýeıd sekildi ortanqol atletter álemde jetip artylady. Basqasha aıtqanda, Golovkınniń tyrnaǵyna tatymaıtyn qarsylas. Bul kezdesýdi qyran men qarǵanyń  aıqasyna balaýǵa bolady. Amerıkalyq boksshy - úıdiń aınalasynan shyǵa almaı, tek osal qarsylastarmen qolǵap túıistirip júrgen úıkúshik sportshy. 18 kezdesýdiń kóbin álsiz boksshylarmen ótkizip, basym bóligin tóreshilerdiń sheshimi arqyly utqan. Bul sıaqty qarsylaspen judyryqtasý mindetti emes. Sondyqtan, naǵyz tańdaý jasaýdyń ýaqyty kelgen sıaqty.

 

Avtory: Erbolat Óstemir 

---