InfoHub Logo

- Ákemniń úsh aǵasy bolǵan, - deıdi apasy. - Bulardy Orazbaıdyń tórt uly deıdi eken. Keýlimjaı, Ámirjaı, Mamyrbaı, Qońyrbaı. Ákem Qońyrbaı solardyń eń kishisi ǵoı. Ol ýaqytta inini aǵa tárbıelep otyrady. İni aǵanyń betine qarsy kelmeıdi. Ákemniń aǵalary minezderi salmaqty, bos, áýleki sózdi jaqtyrta bermeıtin kisiler bolǵan. Ózderi dinge saýatty, sonyń ilimin biletin jandar bolǵan. Tek ákem ǵana bul joldy ustanbaǵan. Óıtkeni zamannyń beti de ózgerip ketken ǵoı. Óziniń qoǵamynyń jumysyna aralasyp ketken kisi.

Ol kezde ákemniń áli aıaqtana qoımaǵan jas jigit kezi eken. Ózderi osyny aıtyp kúlisip otyratyn. Aǵalaryna erip el aralap júredi. Ol ýaqytta atpen júrip aralaıdy ǵoı. Qazaqta qyzy bar úıge tússe, sol úıdiń qyzynyń ádebine de qaraı otyratyn kórinedi. Soǵan oraı, qyzdyń áke-sheshesi de qyzdaryna aıtyp qoıatyn bolsa kerek, úıge qonaq kelip jatsa, ádepti kórin dep. Birde sondaı bir úıge túse qalǵanda, álgi úıdiń qyzy ákemderge shaı quıyp beripti. Sóıtse, ol jerde salt-sanany qatań saqtap otyrady ma, shaı ishilip bolǵannan keıin, shynyaıaq tóńkerilip qoıý kerek eken. Ákem sony eskermegen ǵoı. Endi ol kezde ákemniń jas jigit kezi, aǵalarynan buryn shaıyn iship bolyp, kesesiniń betin alaqanymen jaýyp, boldym degendeı ısharat tanytady. Sóıtse, qyz ákemniń aldyndaǵy kesesin alyp, shaı quıyp usynypty. Óıtkeni shynyaıaq tóńkerilgen joq qoı. Qyz sony eskerip otyr. Ákem qyzdyń qylyǵyna ań-tań bolady. Qyz baıqamaı qaldy ma dep, taǵy da shaıyn
iship bolyp, kesesiniń betin alaqanymen jaýyp, boldym degendeı ısharat tanytsa, qyz ákemniń aldyndaǵy kesesin lyp etkizip alyp, taǵy da shaı quıyp usynǵan ǵoı. Sodan ákemdi kúlki qysady, qyz ózine qaıta-qaıta shaı quıa bergesin. Dastarqannyń basynda qabaǵy qatý aǵalary otyr. Sondaı jerde adamdy kúlki qysqan degen qandaı qıyn. "Bar, shyq dalaǵa!" degen ǵoı aǵalary. Sóıtip inilerin syrtqa shyǵaryp jiberipti. Sodan ana úıden attanyp ketip, aýyl syrtyna shyǵa bergende, attarynyń basyn tartyp turyp, inilerin ortaǵa alypty:

"Áı, seniń baǵanaǵy kúlkiń ne?! Sende bir jigit adamnyń ádebi degen bola ma? Dastarqannyń basynda qyz bala otyr. Jigit adam degen qyz balanyń kózinshe retsiz sóılep, retsiz kúle me eken? Onyń ústine dastarqannyń mádenıeti degen bolmaı ma?" - depti.

Sodan ákem aǵalarynan qysylǵannan shynyn aıtqan ǵoı. Sóıtse, aǵalary dalany jańǵyryqtyryp, inileriniń qylyǵyna ózderi ishek-sileleri qatyp kúlip jatqan kórinedi:

"Óı, sen shynyaıaqty tóńkerýdi eskermegen ekensiń ǵoı. Bul jerde qyz balanyń isi durys. Ózi bir salt-sanany saqtap otyratyn, ádebi bar qyz bala eken", - depti.

- Qazaqtyń dastarqany baı bolady, óziniń as ishý mádenıeti bolady, úlkenniń óz orny bolady, kishiniń óz orny bolady. Qazaqtyń tálimi sol dastarqannyń basynda berilip otyrǵan halyq, - deıdi apasy.

---