InfoHub Logo

QR Bilim jáne ǵylym vıse-mınıstri Ashat Aımaǵambetov elimizdiń bilim berý mekemelerinde latyn grafıkasynda qazaq tiliniń álippesin engizýdiń jospary jaıynda baıandady.

«Jańa grafıka bekitilgen jaǵdaıda barlyq bilim berý mekemelerinde jańa jazbany engizýdiń kestesin bekitýdi josparlap otyrmyz. Osynyń barlyǵyn aldymen pedagogıkalyq, ata-analar qoǵamdastyǵymen, sondaı-aq Mádenıet jáne sport, Aqparat jáne komýnıkasıalar mınıstrlikterimen talqylaımyz. Bul turǵyda qajetti qadamdardy Prezıdent Ákimshiligimen, Úkimetpen kelisip alamyz. Sońǵy sheshim qabyldaý úshin atalǵan másele men kesteni Parlament otyrysyna engizemiz», - dedi vıse-mınıstr parlamenttik tyńdaý barysynda.

Osy oraıda ol aldaǵy jumystarda asyǵystyqqa jol berilmeıtinin, sondyqtan barlyq sharalar bekitilgen kestege sáıkes júrgiziletinin jetkizdi.

Bul rette kadrlardy daıarlaý, oqýlyqtardy, sózdikterdi basyp shyǵarý jumystary eskeriledi. Keıinnen jappaı taralymmen normatıvtik sózdikterdi, oqýlyqtardy, oqý-ádistemelik kitaptar kópshilikke usynylady.

 «Eń basty ári jaýapkershilikti qajet etetin daıyndyq kezeńin sapaly aıaqtaǵannan keıin ǵana jańa jazbany bilim berýdiń barsha mekemesine keń aýqymda engizýge kirisemiz. Bul turǵyda orys tilinde pándi oqytýda kırılısa qalatynyn atap ótkim keledi. Latyn qarpi tek qazaq tiline jáne qazaq tilinde oqytylatyn pánderge qatysty bolady», - dedi Aımaǵambetov.

Derekkóz: QazAqparat

---