InfoHub Logo

Shý ózeniniń bas jaǵyn mekendeıtin uly júzden shyqqan orta sharýasy bar bir adam muqtajsyz ómir súripti. Aqkóńil, qoly ashyq bolǵandyqtan aýyldastary ony «Jomart» atap ketipti. Biraq balasy bolmaı, soǵan qatty renjıdi eken. Jasy elýge aıaq basqan soń muragerlerden de úmit úzip, Qudaı salǵandy kórip, jata beredi. Jubaıy da qarapaıym, joldasynyń aıtqanyn eki etpeı, tatý-tátti ómir ótkizedi.

Qoıan jyly kelgende úlken jut bolyp, eldegi mal bitkenniń bári qyrylyp, halyq asharshylyqqa, bosqynshylyqqa ushyraıdy. Mundaı jaǵdaı Jomartqa da jaqsylyq ákelmeıdi. Kóktemge salym onyń da qysyp ustap otyrǵan birdi-ekili tuıaǵy shóbi bolmaǵandyqtan opat bolyp ketedi. Ol bala ornyna jas maldy: buzaý, qozy, bota, qulyndardy baǵyp-qaǵyp kútedi eken. Endi mal ornynda onyń qystaýynda árnemeni shuqyp, qarqyldaǵan tórt qarǵa qalady. Qarǵalar shaldyń jalǵyz ekenin sezgendeı, bir orynnan ekinshi orynǵa sekirip júrip, bir ýaqytta onsyz da qaıyr suraýǵa, bolmasa ólýge bel baılaǵan jalǵyz shaldyń qasyna keledi. Tipti, olar da jalǵyzsyrady ma, kim bilsin, shaldyń artynan ilesip qalmaı qoıady. Shal bir nársesin umytqan kisideı sál oılanyp turyp, júgirip úıine baryp, dombyrasyn alyp shyǵady. Kóktem lebin ákelgen samal jeldiń yzyńyna qosylyp turyp dombyranyń shegine qol soǵady.

Shal eski bir kúıdi oınap ketti. Dombyra halyq basyna túsken aýyr qaıǵyny sezgendeı bozdaı jóneledi. Kúıde kóńilsiz áýen taqyryby ótip jatyr, birde attyń jelisin beıneleıtin saz da estilip qoıady. Sonan keıin basyn tómen salyp, bir kez ózin-ózi umytqandaı shal kúıdi óte bir názik sezimmen sherte jóneledi. Úzdik-sozdyq dybystary barǵan saıyn baıaýlap, álsirep baryp kúı aıaqtalady.

Jan-jaǵyna baıqap qaraıdy. Tóńirekte eshkim kórinbeıdi. Tek jańaǵy tórt qarǵa ǵana dóńgelengen kózderimen qarap qalypty. Barlyq jerde ólgen mal, jandardyń qaldyqtary kórinedi. Jomart dombyrasyn qaıta qolǵa alyp qarǵalardyń qarqyldaǵan únine eliktetip bir kúı tartty. Dombyra tórt qarǵamen qarǵasha sóılesip ketti. «Senderden basqa meniń eshkimim joq, meni tastap ketpeı-aq qoıyńdar, maǵan eshteńe qalmasa da, sender úshin jetetin azyq mol», — deıdi.

---